Martesa e papritur dhe dasma private e bukuroshes na la të gjithëve gojëhapur, por, tashmë Angela Martini ka vendosur të rrëfejë gjithçka. Modelja dhe miliarderi rumun Dragos Savulescu u martuan në Las Vegas dhe ndryshe nga çdo nuse tjetër, shkodrania  u vesh me një fustan të zi.

Në një program televiziv në Rumani, Angela ka rrëfyer si u njoh me miliarderin dhe kur e kuptoi se kishte rënë në dashuri me të. E pyetur se përse ra në dashuri pikërisht me Dragos, shqiptarja u shpreh se:

Kjo është shumë e thjeshtë. Unë kam udhëtuar në shumë vende të botës, jo si turiste por jam rritur nëpër këto vende dhe të jetosh dhe të jesh turist janë gjëra shumë të ndryshme nga njëra-tjetra. Unë nuk arrita të njihja një person që ishte i thellë, shpirtëror, inteligjent, i ngrohtë, i kujdesshëm dhe një ëndrrimtar. Sepse unë kam njohur djem që kanë pasur lekë nga prindërit e tyre, por nuk është e njëjta ambicie, e njëjta ëndërr.  Kur takova Dragos, zbulova se ai ishte një ëndrrimtar, që kishte një botë dhe donte ta tregonte.

Kush e tha frazën “le të martohemi”?

As nuk e mbaj mend në fakt. Kujtoj vetëm që u zgjuam dhe i thashë Dragos “të dua”, ai m’u përgjigj “edhe unë të dua”. Dhe aty filluam duke thënë le të martohemi, si fillim me shaka. Pastaj u kthye në serioze çdo gjë. Shkuam në Vegas dhe i thashë shoqes sime që do martohemi. Ajo sigurisht që u çudit, por ne e kishim ndarë mendjen. Nuk njoftuam prindërit, miqtë, askënd. Nuk kisha as unazë, as fustan asgjë. Dhe të gjitha këto i gjetëm ditën tjetër në vetëm një ditë.