Goditet një grup që kryenin vjedhje banesash në sajë të operacioni të koduar "Maqellara". Policia e Dibrës ka zbardhur një sërë vjedhjesh të ndodhura më pare ndërsa janë ndaluar 2 shtetas dhe është shpallur në kërkim shtetasi V.R, 24 vjeç,  banues në  Shupenzë, Bulqizë.

Sipas burimeve zyrtare, të ndaluarit janë shtetasit Resmi Jakimi, 31 vjeç, banues në Shupenzë, Bulqizë ( i dënuar më parë për vjedhje) dhe Egert Jakimi, 27 vjeç, banues në Shupenzë, Bulqizë. 

Ndalimi i tyre dhe shpallja në kërkim i një shtetasi tjetër u bë pasi : 

Më datën 22.07.2018, rreth orës 02.30, të natës, në bashkëpunim me njëri-tjetrin kanë vjedhur një sasi nafte prej rreth 60-litrash në fshatin Erebarë në automjetin kamion në pronësi të shtetasit E.L. si dhe kanë tentuar të vjedhin në fshatin Burim, Maqellarë banesën e shtetasit F.L.

Policia e Dibrës menjëherë pas njoftimit të marrë për dy ngjarjet e lartëpërmendura kanë organizuar punën duke ngritur një pikë postblloku të befasishme ku autorët nuk u janë bindur punonjësve të policisë për të ndaluar duke u larguar me shpejtësi me një automjet tip "benz".

Në vijim të veprimeve policore dhe hetimore rezulton se ky grup të jenë edhe autorë të dyshuar të disa vjedhjeve të tjera dhe konkretisht:

  • Më datë 29.04.2018, kanë vjedhur banesën e shtetasit O.Xh, banues në Maqellarë.
  • Më datë 29.04.2018, kanë vjedhur një viç në ahurin e bagëtive të shtetasit F.J, banues në Maqellarë.
  • Më datë 25.06.2018, kanë vjedhur banesën e shtetasit Q.S, banues në Melan.
  • Më datë 19.07.2018, kanë vjedhur dyqanin e shtetasit F.L,  banues në  Maqellarë.

Janë sekuestruar me cilësinë e provës materiale: 

Një automjet tip Benz me targa BZ 2269 A, 3 bidona plastik, veshje të cilët dyshohen se janë përdorur nga autorët, kaçavida dhe aparat celular. 

Materialet proceduriale do ti referohen Prokurorisë Rrethit Dibër për veprat penale të “Vjedhjes”,  kryer në bashkëpunim, më shumë se një herë,  “Vjedhjes” mbetur në tentativë, e kryer në bashkëpunim dhe “Mosbindjes ndaj urdhërit të punonjësit të rendit publike” të parashikuar nga nenet 134/2, 134/2-22 dhe 242 të Kodit Penal.