Mushkonjat kanë “pushtuar” Vollgogradin dhe sigurisht që ishin të pranishme edhe në stadiumin ku u luajt ndeshja Tunizi-Angli.
Prania e këtyre insekteve ishte aq e madhe, sa një gazetare gjermane vendosi që të paraqitej para publikut me një kapelë të posaçme për t’u mbrojtur nga mushkonjat.
Insektet bezdisën shumë lojtarët e të dyja skuadrave, ndërkohë që kishin dalë për të kryer nxehjen e zakonshme, rreth një orë para ndeshjes.
E njëjta situatë vijoi edhe gjatë lojës, ndërsa mushkonjat dalloheshin me sy të lirë edhe gjatë transmetimit televiziv të takimit.
Futbollistët anglezë u lyen të gjithë me solucion kundër mushkonjave, por kjo nuk pengoi që njëra prej tyre të hynte në veshin e Lingardit.
Autoritetet ruse e kishin të qartë se ky fenomen mund të shqetësonte në Volgograd, ndaj kishin bërë spërkatjen në kënetat rreth e qark, dy ditë para sfidës.
Gjithashtu para sfidës u vendos që asnjë tifoz të mos merrte pije dhe ushqim me vete në shkallët e stadiumit, pasi mund të provokonte grumbullimin e mushkonjave.
