Greqia shtyn hapjen e pikës kufitare të Kapshticës dhe 10 ditë të tjera. Ndonëse ishte planifikuar që Kapshtica të qëndronte e mbyllur deri më 4 dhjetor, autoritetet greke kanë vendosur hapjen e saj më 14 dhjetor.
Policia Kufitare njofton se “autoritetet e Policisë Greke, në vijim të masave të marra nga qeveria greke mbi përballimin e situatës së krijuar për shkak të pandemisë COVID-19, kanë njoftuar shtyrjen e afatit të bllokimit të Pikës së Kalimit Kufitar Kapshticë, deri në datën 14.12.2020”.
Deri në këtë datë, nuk do të lejohet lëvizja e këmbësorëve dhe e mjeteve, si në hyrje dhe në dalje të Greqisë.
Policia Kufitare e Kapshticës fton të gjithë qytetarët që duan të udhëtojnë drejt Greqisë, që gjatë këtij harku kohor, të shmangin udhëtimin drejt kësaj pike kalimi dhe të orientohen në drejtim të Pikës së Kalimit Kufitar Kakavijë, në të cilën lëvizja vijon normalisht.
