KPA lë në fuqi vendimin e KPK, shkarkohet nga detyra prokurori i Apelit në Durrës

Kolegji i Posaçëm i Apelimit ka lënë në fuqi vendimin e KPK për prokurorin Bujar Hoti.

Në vendimin e disa ditëve më parë, KPK shkarkoi nga detyra Hotin, prokuror në Prokurorinë e Apelit Durrësit.

Sipas KPK-së, prokurori kishte pasuri të pajustifikuar dhe për këtë arsye, nuk krijoi nivel të besueshëm për të vijuar detyrën.

Vendimi i KPA:

Trupi gjykues i Kolegjit të Posaçëm të Apelimit, i përbërë nga Ardian Hajdari kryesues, Albana Shtylla relatore, Luan Daci, Natasha Mulaj, Rezarta Schuetz, anëtarë, shpalli vendimin për çështjen (JR) nr.31/2018, datë 06.11.2018, për ankimin e subjektit të rivlerësimit Bujar Hoti kundër vendimit nr. 64, datë 10.09.2018 të Komisionit të Pavarur të Kualifikimit.

Në përfundim të gjykimit në dhomë këshillimi, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, vendosi në mënyre unanime:

Lënien në fuqi të vendimit nr.64, datë 10.09.2018 të Komisionit të Pavarur të Kualifikimit, që i përket subjektit të rivlerësimit Bujar Hoti.

Ky vendim është përfundimtar dhe ka efekt të menjëhershëm.

U shpall sot, në Tiranë, më datë 16.09.2019.