Megjithëse impianti i ujërave të zeza është venë më funksion në plazhet e Durrësit, mungesa e nyjeve hidrosanitare publike bën që ky bregdet të jetë ende i ndotur.
Në pikun e sezonit turistik, kur fluksi i pushuesve ka arritur kulmin, frekuentuesit ankohen per mungesën e banjove dhe dusheve publike.
Prej vitesh ky shërbim mungon në këtë plazh, duke mos marrë zgjidhje as këtë sezon turistik.
Mungesa e tyre detyron një pjesë të mirë të pushuesve t’i kryejnë nevojat e tyre fiziologjike ne det, apo në lokalet buzë Adriatikut.
Por përpara thonë pushuesit duhet të behen klientë të tyre, ndryshe nuk i lejojnë.
Para viteve ’90, në plazhin e Durrësit ishin në funksion 11 banjo publike.
Por ky numër u reduktua në vazhdimësi, ndërsa aktualisht ky bregdet nuk disponon asnjë të tillë.
Në të tilla kushte, pushuesit janë të detyruar të kujdesen vetë për higjenën e tyre.
Ata duhet të zgjedhin mes dy mundësive; ose të shpenzojnë më shumë duke përdorur banjot private të bizneseve që operojnë në plazhin e Durrësit për një ambient më të pastër, ose të perdorin detin.
K.H.