Një vit mbas tërmetit të 21 shtatorit ka përfunduar në bashkinë e Durrësit rindërtimi i banesave individuale të shkatërruara nga ky tërmet.
Kryebashkiakja e Durrësit Emiriana Sako ka vizituar disa prej familjeve që jetojnë tashmë në shtëpitë e reja të rindërtuara me standarte bashkëkohore.
Në këto vizita kryebashkiakja Sako shoqërohej nga kryetari i Këshillit Bashkiak Ani Dyrmishi, si dhe kryetarët e njësive administrative nr. 4 dhe nr.6, Davide Ndoj dhe Serjan Mazrreku. Në bashkëbisedimin me banorët e këtyre shtëpive, Sako deklaroi se ashtu siç u rindërtuan banesat e shembura nga tërmeti i 21 shtatorit do të rindërtohen në një kohë të shkurtër edhe të gjitha banesat e shkatërruara nga tërmeti i nëntorit, shtëpi me kushte shumë më të mira se të mëparshmet dhe me standarde sigurie.
Janë 58 shtëpi që janë rindërtuar pasi u dëmtuan rëndë nga tërmeti i shtatorit, ndërkohë që shumë shpejt do të nisë puna për rindërtimin e 904 banesave individuale të dëmtuara në mënyrë të pariparueshme nga tërmeti i nëntorit.
Procesi i rindërtimit vijon në bashkinë e Durrësit me ritme të shpejta, ku 10610 familje kanë përfituar nga granti i rikonstruksionit DS1-DS2-DS3 dhe shumë prej tyre janë në përfundim të riparimeve të shtëpive të tyre.
Po kështu janë 36 pallate të miratuar deri tani, të cilat do të rindërtohen në të njëjtin vend dhe shumë shpejt fillon puna për rindërtimin e pallateve të para.
