Një paketë e tretë financiare po diskutohet nga qeveria, për t’u injektuar në ekonominë e vendit dhe për të ndihmuar rimëkëmbjen e saj për shkak të situatës së krijuar nga Covid-19. I pyetur në studion e emisionit “Opinion”, ministri Arben Ahmetaj, u shpreh se kjo paketë do të jetë e ndryshme tipologjikisht nga dy paketat e para të aplikuara në vend.

“Paketa e tretë është e rimëkëmbjes ekonomike, me injektim në sektor. Investime publike dhe private, kujdes në shtyllën sociale, por nuk do të ketë paketa të tipologjisë 1 dhe 2. Po diskutohet instrumenti i tretë i garancisë për të ndihmuar prodhimin dhe turizmin”, tha Ahmetaj ndërsa pohoi se kjo paketë parashikohet diku në fund të muajit qershor dhe është një plan ekonomik që godet objektivat deri në 2025.