COVID-19/ Gjermania shqyrton mundësinë e kufizimeve më të ashpra

27/10/2020 - 19:11

Kancelarja Angela Merkel ka thënë se mungesa e disiplinës ndaj COVID-19 e ka çuar Gjermaninë në një situatë “të vështirë”. Ajo do të takojë liderët e landeve për të vendosur kufizime të reja për të frenuar pandeminë.

Kancelarja Angela Merkel të martën u bëri thirrje gjermanëve t’i “përmbahen asaj që dimë” për koronavirusin, në një kohë kur Gjermania lufton me një valë të dytë të infektimeve.

“Ne e dimë si mund ta mbrojmë veten. Ne mund të vazhdojmë me një përgjigje më të fokusuar,” tha ajo në Berlin. “Por ne gjithashtu shohim me rritjen e shifrave, që po të mos i përmbahemi asaj që dimë për virusin, ne kalojmë në situata që janë shprehimisht të vështira.”

Merkeli foli përpara një takimi të rëndësishëm me liderë të landeve, të caktuar për të mërkurën, në të cilin ajo pritet të bëjë presion për kufizime më të ashpra për të frenuar përhapjen e COVID-19.

Shtrëngimi i rregullave?

Sipas një raporti në gazetën Bild, qeveria po shqyrton një seri masash të reja që përfshijnë mbylljen e restoranteve dhe lokaleve dhe ndalimin e aktiviteteve publike. Shkollat pritet të qëndrojnë të hapura, me përjashtim të rajoneve me përhapje të mëdha të virusit.

Merkel do të takojë 16 kryeministrat e landeve federale të Gjermanisë, të cilët duhet t’i bindë të pajtohen me kufizimet, të cilat u përshkruan nga Bild si “mbyllje e lehtë”. Masat e marra për të luftuar pandeminë e koronavirusit në Gjermani vendosen në nivel rajonal landesh.

“E qartë se nuk do të jetë e lehtë. Dhe është gjithashtu e qartë se nuk do të jetë e bukur”, tha kryeministri i landit të Bavarisë Markus Söder, i cili ka bërë thirrje për një qasje të unifikuar në të gjithë vendin si përgjigje ndaj pandemisë.

Ai u bëri thirrje udhëheqësve federalë dhe rajonalë të mos prezantojnë “masa me gjysëm zemre, por një koncept efektiv”.

Shumica e gjermanëve po presin që qeveria të vendosë kufizime drastike më të ashpra, sipas një sondazhi të YouGov të porositur nga agjensia e lajmeve dpa. Më shumë se 60% presin që restorantet, dyqanet apo shkollat të mbyllen.

Ministri i Financave Olaf Scholz ka përsëritur thirrjen për një qasje të unifikuar. “Masat shtesë duhet të jenë të kufizuara, të përkohshme dhe të fokusuara,” tha ai. “Dhe ato duhet të zbatohen në mënyrë sa më të unifikuar që të jetë e mundur në të gjithë Gjermaninë dhe të jenë përgjithësisht të kuptueshme.”

‘Rritje eksponenciale’

Përpara takimit, Ministri i Ekonomisë Peter Altmaier paralajmëroi se Gjermania mund të arrijë 20.000 infektime në ditë deri në fund të javës.

“Po përballemi me rritje eksponenciale,” i tha ai një konference ekonomike gjermano-franceze virtuale në Berlin të martën. “Në Gjermani numri i infektimeve të reja po rritet me 70-75% krahasuar me një javë më parë.”

Gjermania raportoi 11.409 raste të reja të martën, nga 6.868 në të njëjtën ditë një javë më parë, sipas Institutit Robert Koch, institutit kombëtar të kontrollit të sëmundjeve të vendit. Gjermania raportoi të shtunën një rekord prej 14.714 raste infektimesh të reja brenda 24 orëve./ DW

/portali DurresLajm/

Na bëni like në facebook!: 

Lajme nga e njëjta kategori

Edhe pse presidenti aktual Donald Trump nuk e ka pranuar humbjen e zgjedhjeve presidenciale, presidenti i zgjedhur i Shteteve të Bashkuar

Kryeministri Boris Johson ka konfirmuar se Britania e Madhe më 2 dhjetor i jep fund ”Lock-Down” të dytë brenda 2020.

Në fakt të gjithë ishin pro bashkëpunimit multilateral, vetëm një person fliste për madhështinë e tij personale gjatë gjithë kohës.

Gazetarët francezë dhe organizatat për lirinë e mediave janë duke e kundërshtuar një projektligj të sigurisë në Francë, në bazë të të cil

Kryeministri i Britanisë së Madhe, Boris Johnson ka reaguar pas publikimit të rezultateve të vaksinës së Universitetit të Oksfordit.

Numri i të prekurve nga koronavirusi në mbarë botën ka shkuar në mbi 59 milionë.

Policia lokale ka informuar se dy persona kanë ndërruar jetë, si pasojë e një sulmi me thikë në një kishë në San Jose të Kalifornisë.

Ish-Presidenti i Francës, Nicolas Sarkozy, do të dalë sot para gjykatës dhe do përballet me akuzat për korrupsion.

I dërguari special i OBSH-së për COVID-19 kritikon reagimin e Evropës ndaj pandemisë së Coronas, duke thënë se vendet nuk arritën të përf