Ndryshimet e klimës që kanë të bëjnë me ngrohjen globale po përshpejtohen, sipas një raporti të Organizatës Botërore të Metrologjisë. Sipas të njëjtave të dhëna, nga viti 2014 deri në vitin 2019 është regjistruar periudha më e ngrohtë ndonjëhere. Edhe niveli i detit është rritur ndjeshëm gjatë të njëjtës periudhë.
Organizata Botërore e Metrologjisë thotë se duhen bërë përpjekje të menjëhershme për të ulur nivelin e emetimit të karbonit. Temperatura globale është rritur me 1.1 gradë Celsius që nga viti 1850. Ndërsa në periudhën midis viteve 2011 dhe 2015, temperatura është rritur me 0.2 gradë Celsius. Sa i përket rritjes së nivelit të detit nga viti 1993 e deri më tani, shkalla mesatare e rritjes është 3.2 milimetra në vit.
Për ndryshimet klimatike, të hënën mbahet samiti i Kombeve të Bashkuara në New York, ku do të prezantohet pikërisht raporti i Organizatës Botërore të Metrologjisë. Në këtë samit do të diskutohet për masat që duhen ndërmarrë për të frenuar ndryshimet klimatike.
