Një stuhi verore ka shkaktuar katër viktima, përfshirë një vajzë 13-vjeçare, dhe njëqind të plagosur në Poloni. Rrufeja ka goditur malet Tatra, pjesa më e lartë e Karpateve, në jug të vendit.

Stuhia shpërtheu në zonën e malit Giewont, 1.895 metra i lartë, qartë i dukshëm nga Zakopane, vendpushimi më i famshëm i turizmit malor në Poloni.

Sipas rindërtimit të ngjarjes, një seri rrufesh kishin goditur një numër të madh eskursionistësh kur ata gjendeshin në majë të malit. Shumë prej të lënduarve pësuan djegie të mëdha e lëndime në kokë, dhe u transportuan me helikopter për në spitalin e Zakopane.

Kryeministri polak ka shkuar menjëherë në vendngjarje ndërsa presidenti i ka shprehur ngushëllime familjarëve të viktimave. Si shenjë e zisë, të gjitha koncertet e Festivalit Folklorik Ndërkombëtar që po zhvillohet në Zakopane janë anuluar.