Shtohet tmerri dhe misteri në Gjermani. Mediet raportojnë se policia gjermane ka gjetur edhe dy trupa të pajetë në një banesë 650 km larg hotelit bavarez, ku një ditë më parë u gjetën të vrarë nga shigjeta harku, tre persona.
Trupat e pajetë u përkasin dy femrave, ndërsa u hasën kur autoritetet gjermane po hetonin vdekjen e një burri dhe dy grave të cilat mistershëm u gjetën dje të vrara nga goditjet e shigjetave.
Banesa në Wittingen ishte marrë nga një grua 30-vjeçare, e cila ishte një nga viktimat e gjetura në dhomën e hotelit.
Autoritetet theksuan se nuk është e qartë se cila ishte marrëdhënia e tyre dhe nuk dihet çfarë ndodhi brenda dhomës së hotelit ose se si vdiqën 5 personat. Prokurorët kanë urdhëruar një autopsi dhe kanë nisur hetimet për të zbardhur ngjarjen që tronditi vendin.
