Rrugët po bëhen me pagesë, por paguam 146 mln euro taksë qarkullimi te nafta në 2018-n

15/04/2019 - 09:44

Shqiptarët paguan nëpërmjet blerjes së naftës rreth 18.3 miliardë lekë ose 146 milionë euro taksa gjatë vitit të kaluar. Sipas të dhënave zyrtare nga Tatimet, të ardhurat tatimore nga Taksat e Qarkullimit dhe Karburantit, të cilat janë programuar 16.4 miliard lekë, janë arkëtuar 18.3 miliard lekë, me një tejkalim prej 1.9 miliard lekë ose 11.5% më shumë. Tejkalimi erdhi për shkak të çmimeve më të larta të naftës në tregjet ndërkombëtare dhe për rrjedhoje edhe në tregun vendas.

Taksa e qarkullimit, që vilet aktualisht në shitjen me pakicë të naftës në nivelin 32.4 lekë për litër me gjithë TVSH për çdo litër karburant dhe parimisht është vënë për të mbuluar shpenzimet e qeverisë për mirëmbajtjen e rrugëve. Taksa u është ngarkuar direkt përdorëseve të rrugëve, të cilët e paguajnë gjatë blerjes së karburantit.

Mirëpo të ardhurat nga taksa e qarkullimit janë disa herë më të larta se sa shpenzimet vjetore të qeverise për mirëmbajtjen e rrugëve.  Gjatë vitit 2018 u shpenzuan 1.5 miliardë lekë ose 12 milionë euro sipas të dhënave zyrtare nga Ministria e Infrastrukturës ose rreth 12 herë më pak se sa taksa e grumbulluar e qarkullimit.

Vitin e kaluar opinioni publik u përfshi në debatin se barra fiskale me destinacion mirëmbajtjen e rrugëve ishte e lartë, teksa qeveria po vjel taksa direkte në rrugët kombëtare, duke nisur me rrugën e Kombit dhe në plan janë dhe rrugë të tjera kombëtare.

Tatimi që parimisht ka për destinacion mirëmbajtjen e rrugëve dhe që paguhet nga përdoruesit e automjeteve te çmimi i karburantit kalon disa fish nevojat e mirëmbajtjes që kërkon infrastruktura rrugore.

Shqipëria ka nivelin e taksimit më të lartë në rajon për naftën, për rrjedhojë vendi ka edhe e çmimin më të lartë të produktit në tregjet e pakicës.

Struktura e të ardhurave tatimore tregon se, TVSH-ja vazhdon të jetë kontribuuesi kryesor në të hyrat publike me 34% të të ardhurave tatimore, Tatimi mbi të ardhurat personale përbën 22 % të të ardhurave tatimore, Tatimi mbi fitimin zë 22 % të të ardhurave tatimore dhe Taksa e qarkullimit mbi karburantin zë 10% të të ardhurave tatimore.

Ish-ministri i Financave Arben Ahmetaj kishte komentuar se Taksa e qarkullimit nuk shkon në destinacionin e përdorimit. Shkon për ndërtim rrugësh, shlyerjen e borxhit të trashëguar, për financimin e shëndetësisë dhe ndihmës ekonomike.

/portali DurresLajm/

Na bëni like në facebook!: 

Lajme nga e njëjta kategori

Sa herë që një shtet përfshihet në kriza politike, që shoqërohen me pasiguri për të ardhmen, monedha e vendit është ajo që e pëson, duke

Është shpresëdhënës fakti se shqiptarët janë arsimdashës, në atë masë se gjysma e atyre që kursejnë, e bëjnë për shkollën.

Shqipëria regjistroi nivelin më të lartë të kredive me probleme (NPL) të sektorit të saj bankar nga 17 vende në Evropën Qendrore, Lindore

Nga data 25 qershor 2019, Banka e Shqipërisë do të hedhë në qarkullim monedhën e re metalike shqiptare me vlerë nominale 10 lekë, me kurs

Emigrantët kanë sjellë pranë të afërmëve të tyre në Shqipëri 150 milionë euro në tre muajt e parë të vitit, një shumë që është pothuajse

Ditën e sotme, Komisioni për Veprimtaritë Prodhuese, Tregtinë dhe Mjedisin, shqyrtoi projektligjin për ratifikimin e marrëveshjes me Mbre

Nëse avioni juaj vonohet më shumë se tre orë, keni mundësinë që të kërkoni kompensim, teksa kompanitë gjithnjë e më shumë po detyrohen që

Ndërtimi i by pasit të Fierit është një histori e komplikuar si shumica e investimeve publike në Shqipëri, por punimet në 22 kilometrat e

Më pak sipërmarrës po marrin iniciativën që të hapin një biznes të ri në Shqipëri.