Katër zyrtarë të Agjencisë për Zhvillimin e Bujqësisë janë arrestuar sot, pas një aksioni që ka kryer Policia e Kosovës në Ministrinë e Bujqësisë.
Sipas raportimeve të mediave, arrestimi i tyre lidhet me dyshimet për marrje ryshfeti në vazhdimësi për ndarje të subvencioneve.
Lajmin për bastisjen në këtë ministri e ka konfirmuar për mediet kosovare zëdhënësi i Policisë së Kosovës, Baki Kelani.
“Mund të konfirmojmë se, Policia e Kosovës është duke e realizuar një operacion policor në disa lokacione, në rajone të ndryshme. Informacione shtesë mund të jipen pas përfundimit të operacionit policor”, ka thënë Kelani.
Ministria e Bujqësisë drejtohet nga Besian Mustafa i LDK-së, ndërsa në krye të Ministrisë së Punëve të Brendshme është Agim Veliu, po nga kjo parti.