SHBA ndërmjetëson marrëveshjen për rihapjen e linjës ajrore Prishtinë – Beograd

20/01/2020 - 18:54

Diplomatët amerikanë ndërmjetësuan të hënën nënshkrimin e një marrëveshjeje midis Kosovës dhe Serbisë për rihapjen e linjës ajrore Prishtië – Beograd, në një përpjekje për përmirësimin e lidhjeve ekonomike midis dy vendeve.

Marrëveshja u nënshkrua nga Milun Trivunac, sekretar shtetëror në ministrinë serbe të Ekonomisë dhe Eset Berisha drejtor i Autoritetit të Aviacionit Civil të Kosovës në ambasadën amerikane në Berlin, në praninë e ambasadorit Richard Grenell, njëherësh i dërguar i posaçëm i presidentit amerikan Donald Trump për bisedimet e paqes Kosovë – Serbi si dhe këshilltarit për Siguri Kombëtare, Robert O’Brien.

Zoti O’Brien, citohet të ketë thënë se marrëveshja e nënshkruar nga përfaqësuesit e të dyja vendeve paraqet “marrëveshje historike”, ndërsa theksoi se nuk ka pasur fluturime të tilla ndërmjet Kosovës dhe Serbisë tash e 21 vjet.

Fluturimet do të realizohen nga kompania ajrore gjermane “Lufthansa”.

Ambasadori Grenell shkroi se “presidenti amerikan, Donald Trump, edhe një herë tjetër na mundësoi një fitore historike. Kosova dhe Serbia sot nënshkruan një marrëveshje për të vendosur fluturimin e parë në mes të Prishtinës dhe Beogradit në 21 vjet”, shkroi ai.

Në Prishtinë, presidenti i Kosovës, Hashim Thaci, mirëpriti kërkesën për hapjen e linjës ajrore Prishtinë – Beograd, duke e cilësuar si hap të rëndësishëm në procesin e normalizimit të marrëdhënieve në mes të të dyja vendeve.

“Unë mirëpres kërkesën e Lufthansas për të hapur një linjë ajrore midis Prishtinës dhe Beogradit. Ky është një hap i rëndësishëm për lëvizjen e qytetarëve dhe procesin e normalizimit. Jam mirënjohës këshilltarit Robert O’Brien dhe ambasadorit Richard Grenell për çuarjen përpara të këtij procesi”, shkroi presidenti Thaci në rrjetet sociale.

Ndërkaq kryeministri në largim i Kosovës, Ramush Haradinaj, tha se “nisma për hapjen e linjës së tretë civile ajrore për fluturime komerciale me Serbinë, pas Shqipërisë dhe Maqedonisë së Veriut, është një hap i madh në përparimin e marrëdhënieve të mira fqinjësore dhe konsolidimin e sovranitetit të Kosovës”.

Synimin e kompanisë gjermane “Lufthansa”, e mirëpriti edhe sekretari i përgjithshëm i NATO-s, Jens Stoltenberg.

“Ky është një hap i rëndësishëm që do të lehtësojë lëvizjen e e njerëzve dhe mallrave në rajonin e Ballkanit Perëndimor. Komandanti i misionit tonë të KFOR-it mban autoritetin për hapësirën ajrore të Kosovës sipas Rezolutës së Këshillit të Sigurimit të Kombeve të Bashkuara 1244. NATO-ja do të mbetet e përfshirë në procesin e gjatë të normalizimit të trafikut ajror në Ballkan”, thuhet në reagimin e zotit Stoltenberg.

Drejtori i Autoritetit të Aviacionit Civil të Kosovës, Eset Berisha, citohet në njoftim të zyrës së tij të ketë thënë se me këtë vihet kontakti në mes dy autoriteteve të aviacionit civil, atij të Kosovës atij të Serbisë si partnerë të barabartë.

“Ky është hap i parë drejt normalizimit të plotë të hapësirës ajrore të Kosovës dhe hapjen e korridoreve ajrore me gjitha shtetet përreth saj. Nga kjo do të përfitojnë më së shumti qytetarët e Kosovës që shfrytëzojnë shërbimet e Aeroportit të Prishtinës”, citohet të ketë thënë zoti Berisha.

Ndërkaq drejtori i zyrës për Kosovën në qeverinë e Serbisë, Marko Gjuriç, tha se linja ajrore mund të jetësohet pas heqjes së tarifave që Kosova u ka vënë prodhimeve serbe dhe pas rifillimit të bisedimeve në mes të Beogradit dhe Prishtinës.

Tarifat prej 100 për qind ndaj mallrave të Serbisë u vendosën në nëntor të vitit 2018 nga qeveria e Kosovës si kundërvënie ndaj fushatës serbe kundër pavarësisë së Kosovës.

Serbia kushtëzon rihapjen e bisedimeve më heqjen e tyre, ndërsa Prishtina rezistoi trysninë ndërkombëtare për pezullimin e tyre.

Marrëveshja e sotme është e para e nënshkruar ndërmjet të dyja vendeve pa praninë e Bashkimit Evropian që është lehtësues i bisedimeve për normalizimin e marrëdhënieve ndërmjet tyre.

Po ashtu, kjo është arritja e parë në marrëdhëniet ndërmjet të dyja vendeve që kur ambasadori Grenell është përfshirë në procesin e bisedimeve ndërmjet Kosovës dhe Serbisë./VOA

/portali DurresLajm/

Na bëni like në facebook!: 

Lajme nga e njëjta kategori

Në konferencën për shtyp që zhvilloi nga kryeministria, Albin Kurti njoftoi heqjen e taksës 100% ndaj produkteve serbe.

Kryeministri i Kosovës, Albin Kurti, ka lajmëruar heqjen e taksës ndaj Serbisë.

Kryeministri i Kosovës, Albin Kurti ka reaguar për vrasjen e ish-luftëtarit të UÇK-së, Qerim Kelmendi, mëngjesin e sotëm në fshatin Zahaq

Një person është gjetur i djegur brenda makinës së tij në fshatin Zahaq të Pejës në orët e para të mëngjesit.

Presidenti i Kosovës Hashim Thaçi tha pas takimit me Sekretarin e Shtetit Mike Pompeo në Departamentin e Shtetit se politika kosovare, pa

Kryeministri Kurti, në opinionin e tij për nënshkrimin e marrëveshjes sekrete, ku FSK’së i ndalohet hyrja në Veri, thotë se presidenti Ha

Tre raste të dyshuara me koronavirus janë paraqitur në pavionin e infektivit në QKUK në Prishtinë.

Kandidati i Partisë Socialdemokrate (SPD) me origjinë nga Pozharani i Vitisë në Kosovë, bëhet deuteti i parë me origjinë shqiptare në

Prokuroria e Posaçme me seli në Hagë, e cila trajton pretendimet për krime lufte në Kosovë, paralajmëroi të hënën fillimin e ngritjes së

Instituti Kombëtar i Shëndetësisë Publike në Kosovë ka njoftuar se pacientja, e cila është dyshuar që është infektuar me virusin koronavi