Dy shqiptarë janë arrestuar nga policia e Romës, pasi janë kapur me armë, drogë e dokumente false. Arrestimi është bërë në periferi të kryeqytetit italian, ku dy shqiptarët braktisën makinën dhe u larguan menjëherë pasi panë policinë.
Të ndaluar pas një ndjekjeje të shkurtër, kontrolli u zbuloi dokumentet false, 2.7 gramë hashash, 4.32 gramë marijuanë e 6 gramë kokainë.
Gjatë kontrollit në banesën e njërit prej tyre zbuloi një pistoletë Beretta kalibër 9, model 84 F, një pushkë gjahu Beretta kalibër 12, model S55B, si dhe municionin përkatës për të dyja. Armët rezultonin të vjedhura në dy episode të ndryshme pak muaj më parë.
Të arrestuarit do të përballen me akuzat e zotërimit të drogës, mbajtjen e paligjshme të armëve dhe mbajtjen e dokumenteve false.
