Këtë të martë, qyteti i Lushnjes u trondit nga të shtënat me armë zjarri, kur një i ri i maskuar tentoi të grabisë një bankë të nivelit të dytë.
I riu është një 25-vjeçar i quajtur Olcion Muço. Madje mësohet se i riu është aktualisht ushtar në detyrë.
Por si ndodhi ngjarja?
I riu ka udhëtuar nga Berati drejt Lushnjes. Rreth orës 16:00 i është afruar bankës së nivelit të dytë dhe ka tentuar të hyjë brenda. Ushtaraku ka qenë i armatosur dhe i maskuar.
Roja e sigurisë e ka pikasur dhe menjëherë dyert e bankës janë mbyllur. Në pamundësi për të hyrë brenda, i riu ka qëlluar drejt objektit dhe më pas është larguar me shpejtësi nga vendi i ngjarjes.
Nuk ka vonuar shumë dhe policia ka arritur ta arrestojë të riun.
