Autoritetet italiane të Katanias kanë arrestuar 2 trafikantë shqiptarë droge, të cilëve u kanë sekuestruar rreth 70 kg marijuanë. Në pranga kanë rënë shqiptarët Beshir Doraci, 32 vjeç dhe Leonard Xhafa, 28 vjeç.

Antidroga siciliane ishte në dijeni të mbërritjes nga Kalabria të një korrieri shqiptar me një ngarkesë te rëndësishme droge.

Në portet siciliane e në rrugët lidhëse me qendrat urbane, forcat e rendit ushtruan një kontroll të fortë policor që bëri të mundur identifikimin e shqiptarit Beshir Doraci, i cili mbërriti në portin e Messinës me tragetin e linjës nga Kalabria e me automjetin e tij tip "BMW".

Së bashku me të por me një automjet tip "Fiat Tipo Station Weagon" udhëtonte dhe shqiptari Leonard Xhafa. Forcat policore italiane ndoqën në distancë udhëtimin e tyre nga porti i Mesinës në brendësi të tokës siciliane dhe më pas i ndaluan ata në daljen San Gregorio të autostradës.

Në automjetin "Fiat Tipo" dejtuar nga Leonard Xhafa u gjetën 22 pako me marijuanë me peshë rreth 70 kg. Pas shitjes në treg kjo lëndë narkotike do të sillte një përfitim prej 160 mijë euro. Shqiptari tjetër Beshir Doraci është i njohur nga forcat e policisë me precedent penal.