65 vjet teatër! Shkëlqimi i teatrit "Aleksandër Mosiu" në Durrës

Postuar: 10/01/2018 - 15:57

2017 që u mbyll, shënoi një epokë të re për teatrin e Durrësit, i cili lavdinë e tij e ka në skenë, teksa salla për çdo shfaqje është plot. Spektatori është kthyer në teatër si kurrë më parë, duke gjetur aty emocionin e vërtetë të të parit e të ndjerit të një shfaqje.

Drama “Askushi” i Bashkim Hoxhës, drama “Natë Misterioze” nga Ferdinant Hysi me regji të Ben Apollonit, “8 femrat” me regji të Driada Dervishit, festivali i fëmijëve “Giffoni”, premiera për fëmijë “Kopellia” “Shirli Valentina””Boing boing”e shumë e shumë të tjera shfaqje kanë korrur sukses të madh e kanë mbajtur për net me radhë frymën e artdashësve durrsakë.

Shfaqjet e planifikuara kanë shtyrë edhe më tej datat e tyre, për shkak të interesit të madh të publikut durrsak, kur kanë gjetur sallë të lirë, ndërsa më pas trupa e aktorëve kanë shkuar nga një qytet në tjetrin, për tu ndjekur po ashtu me të njëjtin interes. Teatri është kthyer në folenë e ngrohtë të një argëtimi cilësor në Durrës.

Strategjia e ndjekur nga drejtori Bashkim Hoxha për bashkëpunime me trupat e teatrit jo vetëm brenda vendit por edhe nga Kosova kanë gjetur terrenin e përshtatshëm për të arritur sukses. Artdashësit kanë përjetuar emocionet e thella që dinë të krijojnë regjisori dhe aktorët, magjinë që përcjellin efektet e ndriçimit e dekoret e realizuara, muzika dhe efektet speciale. Nesër në 11 janar, teatri "Aleksandër Moisiu" në Durrës do të kujtojë 65-vjetorin e themelimit.  Në teatër pritet një ceremoni për këtë ditëlindje, me pjesëmarrje edhe të autoritete vendore.

Infromacione rreth shfaqjeve të vendosura në skenën e teatrit "Aleksandër Moisiu", Durrës.

KINEMAJA E VJETËR – SKENA E PARË

Skena e sallës që më vonë mori emrin “Kino 14 Nëntori” u bë mikpritësja e parë e teatrit profesionist të Durrësit që nga 11 janari i vitit 1953. Shumica e aktorëve themelues nuk jetojnë më, ndërsa disa nga spektatorët e atyre viteve tashmë të thinjur kujtojnë radhët e gjata për bileta në pritje të mbrëmjes kur bashkëqytetarët e tyre aktorë shndërroheshin papritmas në personazhe nga më të ndryshmit e më të çuditshmit.

Nikolin Xhoja, do të bëhej një nga aktorët më të shkëlqyer të komedisë shqiptare, i pavdekshëm më pas edhe në ekranin e kinemasë me rolin e xha Beqos në filmin “Kapedani”. Ndërsa  , Tod Thanasi, një nga intepretët më të mirë të karaktereve të spikatura, një prej të cilëve në dramën “Mulliri i Kostë Bardhit”. Që të ishin të padiplomuar në shkolla arti, njëlloj si kolegët e tyre që i dhanë jetë premierës “Vajza nga fshati” të autorit të njohur Fatmir Gjata.

Ishte 12 prill 1953 dhe trupa e re profesioniste, nën drejtimin e kryeregjisorit të Teatrit Popullor, Pandi Stillu, do të korrte duartrokitjet e para. Kjo komedi u shfaq 44 herë dhe ndoq nga 19.648 shikues, dëshmojnë statistikat e teatrit. Rruga ishte çelur.

Regjisorët Panajot Kolo, Sokrat Mio, Misto Zoto, Kadri Pirro, Haxhi Rama, Mario Ashiku, Kujtim Spahivogli, Serafin Fanku, Enver Plaku, Driada Dervishi, etj. kanë sjellë në skenën e teatrit “A. Moisiu” drama dhe komedi mjaft të dashura për publikun shqiptar si “Prefekti”, “Martesa”, “I sëmuri imagjinar”, Kartela e verdhë”, “Pulëbardha”, “Vjehrra dhe nusja”, “Prindër edukatorë”, “Ylli pa emër”, “Rrënjët”, “Njerëz mbi shkëmb”, “Familja e Peshkatarit”, “Dreqnit e Kënetës”, “Dredhitë e Skapenit”, “Çështja e Ivanovit”, “Votra e Huaj”, “Festa e Fenerëve”, “Invadimi”, “Hijet e Natës”, “Shërbëtori i Djallit”, “Mulliri i Kostë Bardhit”, “Çështja e inxhinier Saimirit”, “Karnavalet e Korçës”, “Koha e komisarëve”, “Ylli pa emër”, “Revizori”, “Një shok i klasës sime”, “Mirëserdhe Elona”, “Pulëbardha”, “Stacioni i fundit”, “Qyteti pa dashuri”, “Hotel Ballkan”, “Shokë lufte”, “Dështimi i një kryqëzate”, “Aeroporti”, “Nusja e humbëtirës”, “Besëlidhja shqiptare”, “Dorina”, “Gërsheti i luftërave”, “Tri ditët e kiametit”, “Trokitje në dyert e dhimbjes”, “Të jesh nënë”, “Dy vëllezër e gjysmë”, “Vajza pa prikë”, etj.

Shumë nga aktorët e teatrit “Aleksandër Moisiu” janë bërë të njohur në shkallë kombëtare përmes interpretimeve dhe individualitetit të spikatur artistik.

Loja aktoriale dhe nuri skenik i Artistit të Popullit, Nikolin Xhoja në rolin e Podgolisenit te “Martesa” e Gogolit njihet si një nga majat e intepretimit të komedisë.  Ndërsa “Nderi i Kombit”, Mirush Kabashi pas formimit dhe kontributit 23-vjeçar në këtë teatër u nderua me çmimin e parë në Festivalin e teatrit eksperimental në Kajro për monodramën “Apologjia e vërtetë e Sokratit”.

Bashkëshortët Vera dhe Spiro Urumi, Vangjel Heba, Lutfi Hoxha, Marta Burda, Filika Dimo, Guljelm Radoja, Liri Lushi, Ali Bega, Xhevdet Ferri, etj. janë disa nga aktorët e tjerë mjaft të vlerësuar që i dhanë këtij institucioni një vend të nderuar në teatrin tonë kombëtar. Bashkë me regjisorët dhe aktorët një meritë të veçantë në suksesin e teatrit kanë pasur edhe skenografët Zef Ujkaj, Ilia Rota, Fatos Mati, Thanas Popi, etj. si dhe punonjësit e “prapavijës” siç thirren edhe sot sektorët e dekorit, ndriçimit, fonisë dhe rekuizitës, pa të cilët shfaqjet teatrale nuk do të ishin të plota.

Veprimtaria e teatrit “Aleksandër Moisiu” lidhet kryesisht me godinën  aktuale të saj, e cila është përuruar  më 8 shkurt të vitit 1965. Salla me cilësi shumë të mira akustike dhe e pajisur me aparaturat e domosdoshme teatrale jo vetëm që i dha një impuls të ri punës së trupës, por afroi gjithnjë e më shumë spektatorë. 

Aleksandër Moisiu aktori shqiptar me famë Botërore e shtriu veprimatrinë në vendet gjermanishtfolëse  në fillim të shekullit 19, duke u bërë shpejt një prej aktorëve më të adhuruar për zërin dhe talentin e tij. Sot adhurohet dhe respektohet sidomos në Shqipëri si një ndër aktorët më të mëdhenj të vendit, edhe pse ai që nga rinia e tij më nuk e vizitoi Shqipërinë. Shkolla e aktrimit në Tiranë, Universiteti i Durrësit, shkolla e mesme e pergjithshme në Kavajë dhe teatri i Durrësit e mbajnë emrin e tij.

/portali DurresLajm/

Na bëni like në facebook!: 

Lajme nga e njëjta kategori

   Këto ditë qyteti i Durrësit ka pritur disa vizitorë të veçantë.

Me rastin e 550-vjetorit të vdekjes së heroit tonë kombëtar Gjergj Kastriot Skënderbeu, aktivitete të shumta janë zhvilluar në qytetin e

Më datë 17 janar 2018, u çel në ambientet e bibliotekës së Kampusit të Ri të UAMD-së, Ekspozita ‘Në gjurmët e Gjergj Kastriot - Skënderbe

Në galerinë e arteve pamore “Nikolet Vasija” në Durrës është çelur një ekspozitë nga stilistja Iliriana Zahiri, në të cilën është përmble

   Baritoni Gëzim Myshketa na ka bërë krenarë në shumë skena të teatrove europiane dhe botërore ku ka interpretuar.

   Sot një nga qytezat e Italisë identifikohet më këtë vepër monumentale.

   Violinisti durrsak Olen Çezari, i cili me talentin e tij ka mahnitur edhe të huajt, ka interpretuar me violinë në një vend të pazakont

Valltarja Liljana Cingu, partnerja e përhershme e Rexhep Çelikut në performancat e tyre në skenë ka treguar pengun më të madh të mjeshtri

Drejtoria Rajonale e Kulturës Kombëtare Durrës, zbatoi projektin për mbulimin e mozaikut të Bazilikës së Shën Mëhillit në Arapaj, të qyte

E paarritshme në skenë, gjithmonë e respektuar dhe modeste, ikona e humorit shqiptar, Zyliha Miloti e cila ka festuar 72-vjetorin e lindj