-75 vjet regjisurë, përkthime dhe letërsi origjinale

Regjisori, shkrimtari dhe përkthyesi Gjergj Vlashi sot feston 92-vjetorin e lindjes.

Artisti i mirënjohur nga Durrësi vazhdon të jetë produktiv duke sfiduar moshën. Një pjesë e librave që ka shkruar dhe përkthyer vazhdojnë të presin radhën e botimit. Prej më shumë se treçerek shekulli mjeshtri Vlashi e ka pasuruar skenën e varietesë, fushën e përkthimit dhe letërsinë shqipe me 100 shfaqje dhe mbi 50 publikime librash.

Gjergj Vlashi ka lindur e ka jetuar vazhdimisht në qytetin bregdetar, duke u vlerësuar me titullin “Qytetar nderi” dhe duke u kthyer në një simbol të Durrësit.

Njohës i disa gjuhëve të huaja Gjergj Vlashi ka sjellë në gjuhën shqipe një varg botimesh me përkthime nga autorë të njohur si Franz Kafka, Jose Saramago, Agata Kristi, Dino Buxati, shkrimtarë rusë, italianë, austriakë, spanjollë, portugezë dhe hispanoamerikanë te shekullit te XX-te, etj.

Librat e tij janë botuar edhe në Kosovë dhe në Itali.

I nderuar me titujt e lartë “Nderi i Kombit”, “Artist i Popullit” dhe “Mjeshtër i Madh i Punës” Gjergj Vlashi është mjaft i njohur si themelues i Varietesë dhe regjisor i Estradës së Durrësit në vitin 1960, ndërsa ka botuar rreth 50 vepra në letërsi origjinale, përkthime dhe komedi.

Regjisori i shquar i varietesë, i cili është kthyer këto ditë në Durrës, jeton mes Shteteve të Bashkuara të Amerikës, Spanjës dhe Durrësit, qytetit të tij të lindjes.  

G.K.