“Furgonin e kishim dhomë zhveshje”, rrëfehet kapitenia e kombëtares së femrave

08/05/2021 - 20:01

Një nga më të rëndësishmet në fushë për kombëtaren e femrave është edhe Albina Rrahmani. Ajo aktivizohet me Vllazninë, ndërsa është kapitene e vajzave kuqezi. Në një intervistë për fshf.org, Rrahmani thekson se ajo mundohet të jetë shembull për vajzat e tjera, ndërsa shton se shiriti nuk të bën kapitene.

“Shiriti nuk të bën as lider më të mirë, as lojtare më të mirë edhe as njeri më të mirë. E them gjithmonë që nuk është shiriti ai që të bën kapitene. Duhet shumë punë dhe shumë përkushtim për të qenë shembull për vajzat e tjera. Jam unë ajo që mundohem t’i udhëheq dhe punoj për veten dhe për to, në mënyrë që të më shohin mua se si punoj dhe ato të punojnë si unë. Nuk është e lehtë, është shumë përgjegjësi, por është krenari dhe ndjenjë e veçantë. Ndihem në njëfarë forme me fat që kam lindur në Prishtinë, por jetoj në një lagje të qetë në periferi të kryeqytetit, në një shtëpi të madhe dhe ku fatkeqësisht ndoshta për kohën, luaja futboll vetëm me djemtë, pasi vajzat e tjera nuk luanin. Kështu e kam nisur unë futbollin, luaja me shokët si dhe luaja edhe vetë në shtëpi, ku shok kisha murin, ashtu sikurse e kisha edhe gjatë kohës së pandemisë, ku nuk na lejohej të dilnim jashtë”.

Nisja në Kosovë- “Ndërsa ishim në shkollë, një shoqe më thotë se është hapur një klub futbolli për femra, Kosova e Prishtinës. Ishte data 4 tetor 2002, datë kur ky klub është themeluar. Nuk kam menduar dy herë, si, qysh, tek, por menjëherë kam shkuar të regjistrohem e t’i bashkohem atij klubi. Sot, mbaj kartën e lojtares së parë femër të regjistruar në Kosovë në futboll. Prej ditës që i jam bashkuar atij klubi, kurrë më nuk jam ndarë nga futbolli. Kam luajtur për 10 vite me Kosovën e Prishtinës, më pas kam kaluar në Shqipëri, ku jam aktivizuar me klubin e Juban Danjës, për një vit dhe pastaj iu bashkova Vllaznisë. Kam pasur eksperienca edhe jashtë vendit.

Ndarja e kohës mes shkollës dhe futbollit ka qenë pak e vështirë. Më duhet t’i bëja të dyja paralel. Kam studiuar në degën “Menaxhim biznesi” dhe jam diplomuar në nivel Bachelor si dhe në “Shkenca Sportive”, ku edhe këtu kam përfunduar nivelin Bachelor të studimeve. Kur kam filluar futbollin, kam qenë në fillim të shkollës së mesme. Mbaj mend që zgjohesha herët në mëngjes, bëja stërvitje me djemtë, pasi ekipi e kishte stërvitjen pasdite dhe unë isha në shkollë. Pas stërvitjes, merrja autobusin për në shkollë dhe pas shkollës isha e regjistruar dhe ndiqja disa kurse. Kur kthehesha në shtëpi, më mbetej veç të konsumoja darkë, të bëja detyrat dhe të flija gjumë.

Nuk i kemi pasur kushtet që kemi sot, thuajse asgjë. Kur kam filluar me Kosovën e Prishtinës, kemi pasur një fushë shumë të keqe, ku si porta vendosnim dy gurë dhe vetëm një a dy topa gjithsej. Fugoni, mjeti ynë i transportit, përveç se shërbente  si mjet transporti, shërbente edhe si dhomë zhveshjeje për ne. Mund të duket e pabesueshme, por kemi kaluar shumë. Një karrierë e nisur mes sakrificash, por dashuria për futbollin i bën të gjitha të harrohen”.

Dëmtimi- “Kam dëmtuar ligamentin gjatë një ndeshjeje dhe kam kaluar një operacion shumë të vështirë, që më mbajti për një kohë të gjatë jashtë fushës. Kam qëndruar me paterica dhe mbaj mend që dilja në qytet shpesh dhe njerëzit më shihnin të habitur, pasi bëja edhe aktivitet fizik. As atëherë nuk hoqa dorë nga kjo lojë… Prindërit e mi kanë qenë ata të cilët më kanë mbështetur dhe më kanë thënë të vazhdoj rrugën time, të ndjek ëndrrat e mia, por gjithmonë, shkolla ishte kryesorja. Për mua ata janë heronjtë e mi, pasi kanë punuar shumë që fëmijëve të tyre mos t’u mungonte asgjë”.

Ftesa në kombëtare- “Kur kam marrë ftesën kam qenë njeriu më i lumtur në botë. Ftesa erdhi tek ekipi i Kosovës së Prishtinës. Vendimi im është marrë në atë moment dhe nuk kam menduar kurrë ta ndryshoj, as kur mora ftesën për të përfaqësuar Kosovën. Kosova është vendlindja ime, por ne identifikohemi me ngjyrat kuqezi dhe jam krenare që luaj për Shqipërinë. Dita e parë në grumbullim ka qenë shumë e veçantë. Unë dhe disa vajza të tjera nga Kosova kishim marrë ftesën për të qenë pjesë e Kombëtares. Pasi arritëm në Kamëz, siç ishim të gjitha, trajneri na kërkoi të tregonim se në çfarë pozicionesh luanim. Mbaj mend që vetëm unë dhe një vajzë tjetër dolëm në mbrojtje dhe pjesa tjetër në mesfushë dhe sulm”.

Roli i mbrojtëses- “Unë nuk e shoh veten si Cana, unë jam Albina. Cana është shumë lart për mua, është një nga lojtarët që më ka bërë ta dua më shumë futbollin e sidomos Kombëtaren. Shpresoj dhe do kisha qenë shumë e lumtur nëse ndonjëherë në jetë, dikush do të më shihte mua, si e shikoj unë Canën. Fanella e Kombëtares, ngjyrat dhe flamuri kuqezi janë gjëja më e shtrenjtë për mua. Ndjenja më e bukur në botë, që nuk e përshkruaj dot me fjalë dhe nuk do ta ndërroja me asgjë në jetë, sesa të këndosh himnin e flamurit në fushë. Është nder dhe krenari, nëse ndonjëherë do të më jepej rasti për t’i mbrojtur këto ngjyra, qoftë edhe duke luajtur futboll, do të bëja çmos. Për mua, Kombëtarja është arritja më e madhe në jetë. Dhe nëse dikush do të jetë pjesë e Kombëtares, duhet të punojë shumë, jo vetëm me ekipin, por edhe individualisht”.

Momentet më të bukura- “Kur jemi kualifikuar në paraeliminatore në Maltë për herë të parë me Kombëtaren. Ishte hera e parë që merrnim pjesë  në një kompeticion europian, ishim vajza të reja, pa eksperiencë, as Ligë nuk kishim dhe sërish ia dolëm. Tani që e mendoj, kuptoj se ne shqiptarët jemi vërtetë luftarakë, jemi mësuar me luftëra, jemi mësuar mos t’i arrijmë gjërat lehtë, por sërish ia dalim! Hera e dytë ka qenë në 2017, kur arritëm të kualifikoheshim për Eliminatoret e Kupës së Botës për femra, ku siguruam vendin e parë në grup në raundin paraeliminator. Kemi qenë në të njëjtin grup me Kosovën, që e mundëm, barazuam me Maltën dhe ndeshjen e tretë fituam me Greqinë në minutën e 93-të të takimit”.

Ndeshja me Kosovën- “Na dukej sikur minutat ishin vite, nuk përfundonte sfida. Gjatë gjithë ndeshjes na dridheshin këmbët, kishte shumë presion dhe nuk dija çfarë të bëja më parë, por kam bërë të pamundurën që t’i mbaja shoqet e ekipit sa më lirshëm”.

E ardhmja- “Për momentin po bëj kursin për të marrë licencën e trajneres UEFA A. Si qëllim kam ta marr edhe UEFA PRO në të ardhmen e afërt, por ambiciet e mia janë më lart. Sa më shumë kalojnë vitet, aq më shumë kuptoj se unë i përkas këtij vendi dhe dua të vazhdoj këtu, për t’i ndihmuar vajzat e vogla që ato të mos kalojnë gjërat që më është dashur mua të kaloj”.

Mesazhi për të rejat- “Vajzave, që duan të luajnë futboll, dua thjesht t’u them se duhet shumë punë e sakrificë, por gjithçka arrihet. Ndërsa për prindërit, do t’i isha drejtuar më shumë në formë lutjeje, sesa kërkese, që t’i lënë fëmijët  të ndjekin ëndrrat dhe t’i mbështesin ato, çfarëdo lloj ëndrre të kenë. Futbolli nuk është thjesht një sport, është shumë më shumë. Përmes futbollit ruhet shëndeti i fëmijës, si dhe i mban ata të shoqëruar me fëmijë të tjerë, të mirë e të shëndoshë si vetja. Përpos çdo të mire që sjell futbolli për fëmijën, nderin më të madh ia bën prindërve. I bën ata krenarë!”.

/portali DurresLajm/

Na bëni like në facebook!: 

Lajme nga e njëjta kategori

Një postim në rrjete sociale i kryebashkiakut të Tiranës, Erion Veliaj ka ngritur dyshimet se këngëtarja shqiptare me famë botërore, Dua

Kombinimi i veshjeve me aksesorë shtesë për të krijuar një stil unik është pjesë e pandarë e përditshmërisë së artistes durrsake Asel Ist

Majat e djegura të flokëve janë një shqetësim i vazhdueshëm, por nëse tregohesh pak më e kujdesshme, mund t’i evitosh.

Princi Philip do të kishte festuar 100-vjetorin e lindjes më 10 qershor dhe me rastin e ditës së tij të lindjes, anëtarët e familjes mbre

Marsi është planeti i energjisë dhe jetës suaj mund t’i kishte munguar, por kjo situatë po ndryshon pasi tashmë planeti do të kalojë në s

Janë plot dhjetë ndryshime ato të cilat sjellin në vetvete kundërshtime mes gjinisë mashkullore dhe femërore.

Kur punojmë shumë për të përfunduar një projekt, shumica prej nesh përpiqen të dëgjojnë muzikë, në mënyrë që të përqendrohemi në detyrën

Një 18-vjeçare në Itali ka ndërruar jetë si pasojë e një tromboze.

Studiuesja e astrologjisë Keti Sula ka treguar se përse kryeministri Edi Rama fitoi zgjedhjet parlamentare të 25 prillit.

Në verë më shumë se kurrë, dielli shqetëson shikimin tonë, prandaj përdorimi i syzeve dielli bëhet më i domosdoshëm.