Aktorja dhe skenaristja italiane, Daria Nicolodi ka ndërruar jetë në moshën 70 vjeçare.
Shkaku i saj i vdekjes nuk dihet, por vdekja e saj u konfirmua nga vajza dhe aktorja Asia Argento.
Asia në rrjetet sociale shkruan: “Pusho në paqe nënë e dashur. Tani mund të fluturosh e lirë me shpirtin tend të shkëlqyeshëm dhe nuk do të kesh më vuajtje.
Unë do të përpiqem të vazhdoj për nipërit dhe mbesat tuaja të dashura dhe veçanërisht për ty që kurrë nuk do të doje të më shihje të pikëlluar. Edhe nëse pa ty më mungon toka nën këmbët e mia dhe ndjej se e kam humbur pikën e referimit të vërtetë. Unë jam afër të gjithë atyre që e kanë njohur dhe dashur. Unë do të jem gjithmonë Asia jote.”
Daria ka lindur në Firence në vitin 1950, ndersa karriera e saj artistike shtrihet në disa dekada.
Nicolodi bëri debutimin e saj si aktore në “Shumë luftëra përpara” të mjeshtrit italian Francesco Rosi. Në vitin 1974 u takua me Dario Argento-n, me të cilin ajo pati një romancë të gjatë, duke u bërë muza e tij si brenda ashtu edhe jashtë ekranit.
Në 1975, Nicolodi lindi vajzën e tyre, Asia Argento, tani një aktore, regjisore, këngëtare dhe personalitet i njohur në media.
