Një avion i British Airways, ka thyer rekordin për fluturimin më të shpejtë të kohërave mes New York-ut dhe Londrës, duke arritur shpejtësinë e mbi 1287 kilometrave në orë.
Avioni “Boeing 747” fluturoi gjatë natës mes të shtunës dhe të dielës dhe arriti në destinacion në katër orë e 56 minuta, ndërsa stuhia Ciara i ishte drejtuar Mbretërisë së Bashkuar.
“Fluturimi ishte shumë më i shpejtë se zakonisht me erën që e kalonte shpejtësinë e 321 km në orë” – thanë ekspertët. Avioni u ul në aeroportin Heathrow në orën 4.43 minuta, thuajse dy orë më herët nga sa ishte planifikuar.
Shpejtësia maksimale e tij në fluturim ishte 1327 km në orë sipas Flightradae24, një shërbimi të gjurmimit online të fluturimeve. Platforma vlerëson se koha mesatare që i duhet një avioni të përshkojë distancën mes Londrës dhe New York-ut është gjashtë orë e 13 minuta.
Por avioni i British Airways, e bëri këtë për dy orë më pak duke thyer edhe rekordin e një avioni airbus A 350 të Virgin, fluturimi i të cilit në të njëjtën distancë kishte zgjatur disa minuta më shumë.
