Në përfundim të takimit me kreun e PD-së, Lulzim Basha, aleatët e tij tregojnë disa prej qëndrimeve të mbajtura në mbledhjen me dyer të mbyllura.
Kreu i LZHK-së, Dashamir Shehi ka deklaruar se takimi me kryedemokratin Basha është zhvilluar për t’i dalë përballë situatës politike ku ndodhet vendi.
Sipas tij, opozita e bashkuar ka vendosur t’i rikthehet protestave javës që vjen në të gjitha qytetet e Shqipërisë për t'u mbyllur nga fundi i javës me një tjetër protestë kombëtare.
“Po bëhemi gati për një miting tjetër të madh në Tiranë, nga fundi i javës që vjen. Në këtë situatë Shqipërinë e solli zoti Rama që do të bëjë zgjedhje. Opozita është më e bashkuar se kurrë. Deri më datën 30 Shqipëria dhe opozita do të jetë në këmbë”, tha Shehi.
Ndërkaq, kryetari i Partisë Republikane, Fatmir Mediu tha në një deklaratë për mediat se zgjedhjet do bëhen kur të jetë larguar Edi Rama. Ai theksoi se protestat do vazhdojnë pa dhënë një datë konkrete.
