Kreu i Partisë Demokratike, Lulzim Basha ka deklaruar se kapja e organit të akuzës nga kryeministri Edi Rama është paralajmëruar më herët nga opozita.
Basha sqaroi se qëllimi i kapjes së Prokurorit të Përgjithshëm është i qartë dhe evident, pasi edhe më kritikët i kanë para syve kryerjen e akteve kriminale të bëra nga Kryeprokurori i Përgjithshëm.
Basha e nisi me Saimir Tahirin, Mark Frrokun, grupin e ‘Xibrakës’, Emiljano Shullazin, por shtoi edhe ngjarjet e ditëve të fundit si sulmi me bombë në Shkodër, vrasja në Tiranë dhe së fundmi vjedhja e bankës.
"Saimir Tahiri kreu krimin kushtetues. Kapi Prokurorinë. Njeriu që uzurpon dhe që po luan teatrin e kukullave është Kryeprokurori i Përgjithshëm. Kjo u paralajmërua nga opozita. Kjo është rruga e aleancës me krimin për të marrë dhe mbajtur pushtetin. Është rruga e mbrojtjes dhe mbajtjes e krimit. Dhe e vetmja mënyrë për të garantuar këtë pushtet dhe paprekshmërinë e kriminelëve është kapja e institucioneve. Autokratët kanë vetëm një rrugë, antikushtetueshmërinë
Qëllimet e kapjes së Prokurorit të Përgjithshëm janë të qarta dhe evidente. Edhe më kritikët i kanë para syve të tyre kryerjen e akteve kriminale të bëra nga Kryeprokurori i Përgjithshëm. Pas zgjedhjes së Kryeprokurorit, Saimir Tahirit iu hoq pezullimi i mjeteve të identifikimit. U lirua biznesmeni që u kap me 863 milionë euro dhe me patentat e Tahirit në makinë.” – u shpreh Basha.
“Frrokut dhe grupit Xibraka, ku ka të dhëna të forta për përfshirjen e familjarëve të kryeministrit, iu ulën dënimet.
Hetimet për Shullazin kanë marrë kthesë të forta. Sot prokuroria njoftoi refuzimin e hetimit për pengimin e deputetëve të opozitës në 18 dhjetor. Sot ka ndodhur një grabitje në mes të Tiranës, dje një vrasje, po ashtu edhe një para pak ditësh, eksplozivi është bërë i përditshëm.
Qeveria shkel kushtetutën për të mbrojtur peshqit e mëdhenj dhe pengon krijimin e KLP. Qeveria ka qëllim që SPAK, ti përkasë kryeministrit dhe bandës që i ka dalë për zot dhe e mbron në cdo akt. Në kundërshtojmë dhe u bëjmë thirrje njerëzve që të mos vendosin krimin mbi Shqipërinë",- tha Basha.
