Pas Vasilika Hysit dhe Besnik Bares, një tjetër deputet i Partisë Socialiste lajmëron largimin nga politika.
Bëhet fjalë për ish-prefektin e Tiranës, Sadi Vorpsi, i cili përmes një postimi në rrjetet sociale thotë se nuk do të kandidojë sërish në 25 prill, pasi ka vendosur t’ia lërë vendin prurjeve të reja.
Vorpsi shkruan në Facebook se edhe pse do të tërhiqet nga politika e drejtpërdrejtë, do të vazhdojë të mbështesë Partinë Socialiste.
POSTIMI I PLOTË
Të nderuar miq, mbështetës e dashamirës!
Pas 4 vitesh kontribut si Prefekt i Qarkut Tiranë dhe 4 vitesh si deputet i Partisë Socialiste, kam vendosur t’ia kaloj stafetën prurjeve të reja për t’u fokusuar më shumë tek familja ime dhe në angazhime të tjera private. T’i sherbeja vendit dhe qytetit tim ka qenë nder dhe privilegj i jetës sime.
Partia Socialiste është jo vetëm shtëpia më e madhe politike, por dhe më përparimtarja e gjithëpërfshirësja. Edi Rama e transformoi nga një parti në opozitë të vështirë, në forcën vendimtare për qeverisjen dhe modernizimin e vendit.
Kam shijuar çdo moment përfaqesimin e komuniteve nga zemra e Tiranës, e më pas në Vorë e në Farkë dhe jam krenar për gjithçka kemi arritur së bashku. Edhe pse nuk do të kandidoj sërish, do të jem po aq aktiv në fushatën e 25 Prilllit për mandatin e domosdoshëm të PS dhe Edi Ramës për t’i çuar gjer në fund punët e nisura e për ta bërë Shqipërinë zonjë.
Ju falenderoj nga thellësia e zemrës për të gjithë mbështetjen dhe mezi pres të bashkojmë forcat për fitoren e 25 Prillit.
Juaji gjithmonë, Sadi
