Gjermania kundër djegies së mandateve: Të gjitha partitë të garojnë në zgjedhjet e 30 qershorit

22/03/2019 - 18:39

Qeveria gjermane ka ripërsëritur qëndrimin se djegia e mandateve parlamentare në bllok nga deputetët e opozitës është një vendim i gabuar.

Deklarata vjen nga Christian Hellbach, i ngarkuari  për Evropën Juglindore, Turqinë dhe Shtetet e EFTA-s pranë Ministrisë Federale të Punëve të Jashtme dhe Thomas Ossowski, i ngarkuari për Politikat e BE-së pranë Ministrisë Federale të Punëve të Jashtme pas vizitës që ata patën në Tiranë.

"Ne ishim sot në Tiranë dhe kemi zhvilluar biseda me Presidentin e Republikës Meta, Kryeministrin Rama, Ministrin e Brendshëm Lleshaj, Ministrin në detyrë për Evropën dhe Punët e Jashtme Cakaj si dhe me kryetarin e Partisë Demokratike Basha dhe përfaqësues të shoqërisë civile.

Tema e bisedave ishte situata aktuale e politikës së brendshme pas dorëzimit të mandateve nga opozita. I kemi dëgjuar me vëmendje argumentat e të gjitha palëve. Debatet dhe përballjet politike janë të dëshiruara në çdo demokraci. Dhe: E drejta për të protestuar është një element i rëndësishëm i kushtetutshmërisë demokratike. Por dhuna është e papranueshme" thuhet në deklaratën e përbashkët.

Zyrtarët e Ministrisë së Jashtme të Gjermanisë u bëjnë thirrje të gjitha partive të tregojnë përgjegjësi përkundrejt zgjedhësve të tyre dhe të marrin pjesë në zgjedhjet vendore të datës 30 qershor.

"Rekomandimet e OSBE-ODIHR-it,- të cilat u drejtohen si pushtetit ekzekutiv ashtu edhe atij legjislativ, kanë bërë të qartë, se në cilët sektorë duhet të përmirësohet ende sistemi zgjedhor shqiptar. Qeveria Federale është angazhuar prej muajsh tanimë, që reforma zgjedhore të shkojë përpara dhe ka financuar ndër të tjera punën e ekspertëve të pavarur për këtë qëllim. 

Shqipëria duhet të zhvillojë instrumenta efektivë për të parandaluar mashtrimet në zgjedhje dhe blerjen e votave  si dhe për të ndjekur në mënyrë të vendosur çdo moment dyshimi.  Duhet të garantohet besimi i pakufizuar i qytetarëve në forcën e votës së tyre! Por kjo arrihet vetëm me një parlament funksional. Ne u bëjmë thirrje të gjitha partive, të punojnë në mënyrë konstruktive për reformën zgjedhore".

Sa i takon akuzave të opozitës, të cilat kanë të bëjnë me mbarëvajtjen e zgjedhjeve të kaluara, zyrtarët gjermanë thonë se duhet të verifikohen dhe përpunohen nga drejtësia dhe parlamenti në përputhje me procedurën e parashikuar për këtë.

Për Christian Hellbach dhe Thomas Ossowski, është detyra e të gjithë deputetëve të zgjedhur, pikërisht në parlament, me angazhim dhe në mënyrë konstruktive, të çojnë përpara reformat e nevojshme dhe të arrijnë rezultate konkrete.

"Shqipëria është, p.sh. në reformën e drejtësisë, në rrugë të mbarë. Kurse bojkoti i parlamentit dhe sidomos dorëzimi i mandateve është për ne i gabuar".

/portali DurresLajm/

Na bëni like në facebook!: 

Lajme nga e njëjta kategori

Kryetari i PD-së, Lulzim Basha dhe dy drejtuesit e tjerë, Arben Ristani dhe Ilir Dervishi e kanë konsideruar në shkelje të ligjit thirrje

Presidenti i Republikës, Ilir Meta ka dhënë një intervistë të gjatë për televizionin “Al Jazeera”, ku ka “skanuar” situatën politike dhe

Në një deklaratë për mediat, kryeemokrati Lulzim Basha ka reaguar pas dhënies së masës arrest me burg për 4 nga 7 të arrestuarit në Libra

Kryeministri Edi Rama ndërsa po zhvillonte fushatën e radhës elektorale në Pogradec, ka ironizuar opozitën me “filxhanin”.

Kryeministri Edi Rama nga Pogradeci komentoi vendimin e gjykatës së Elbasanit për të lënë në burg 4 nga shtatë të arrestuarit ndërsa tha

Kryeministri Edi Rama ka vijuar takimet elektorale në qytetin e Pogradecit ku si çdo herë tjetër edhe sot nuk ka kursyer ironitë dhe sulm

Mbështetësit e opozitës kanë pritur sërish me protesta kryeministrin Edi Rama, i cili po vijon takimet elektorale në juglindje të vendit.

Kreu i partisë Agrare Ambientaliste, Agron Duka ka reaguar pas lajmit se gazetari gjerman Peter Tiede do të publikojë ditën e nesërme për

Sekretari i Përgjithshëm i Partisë Socialiste, Taulant Balla zhvilloi një takim me shqiptarët që jetojnë e punojnë në Selanik të Greqisë.

Kryetari i Partisë Demokratike, Lulzim Basha thotë se kryeministri Edi Rama prej një jave po kërcënon opozitën.