Gjykata e Tiranës ka rrëzuar padinë e kryetarit të Bashkisë së Durrësit, Vangjush Dako, bërë ndaj kryetarit të Partisë Demokratike, Lulzim Basha.
Dakoi e paditi Bashën për shpifje duke kërkuar dëmshpërblim, pas akuzave të këtij të fundit se kryebashkiaku i Durrësit ishte i lidhur me krimin.
"Kam vendosur ta çoj në gjyq Lulëzim Bashën, si një shpifës profesionist që e ka kaluar cakun e tolerancës time. Ky njeri që gënjen sy për sy kë t’i dalë përpara, një i paaftë që si kryetar bashkie la kokrrën e namit me paaftësinë e me gënjeshtrat e tij dhe si kryetar i opozitës e ka bërë qesharake Partinë Demokratike, duhet të përgjigjet përpara drejtësisë për shumë gjëra. Por nëse për ato të rëndat fare me dëme ekonomike kolosale, do t’i japë patjetër përgjigjet e veta përballë institucioneve të reja të reformës në drejtësi që ai po bën çmos ta bllokojë, me mua do të përballet e do të përgjigjet përpara gjykatës për shpifjet e tij prej mashtruesi profesionist", deklaroi Dako në kohën kur bëri padinë.
