Miratimi pa vonesa i ndryshimeve konsensuale në Kodin Zgjedhor, sipas PD-së do të ishte hapi i parë për të dëshmuar vullnet për përmbushjen e kushteve për hapjen e negociatave.
Në një deklaratë publike, sekretari i Përgjithshëm i PD, Gazment Bardhi, shprehet se çdo ditë që vonohet përfshirja e këtyre ndryshimeve për miratim në seancë plenare është një ditë e humbur në rrugëtimin e Shqipërisë në BE.
“Zbatimi sa më parë i ndryshimeve ligjore do të mundësonte jetësimin e garancive shtesë, përfshirë fillimin nga puna sa më parë të KQZ-së për zbatimin e identifikimit biometrik”.
Bardhi i ka bërë thirrje kreut të Kuvendit që të mundësojë përfshirjen e ndryshimeve në Kodin Zgjedhor në seancën plenare të radhës.
“Kryetari i Kuvendit të ushtrojë përgjegjësinë e tij për të mundësuar përfshirjen e ndryshimeve në Kodin Zgjedhor në seancën plenare të rradhës. Në këtë mënyrë, 3 vite nga fillimi i punës për Reformën Zgjedhore dhe 1 muaj nga Dakordësia e 5 Qershorit, Shqipëria ka shansin të tregojë se integrimi europian është vërtetë prioritet kombëtar dhe se institucionet janë të përkushtuara për të ushtruar përgjegjësitë e tyre, pa vonesa, në këtë proces jetik për të ardhmen europiane të Shqipërisë”.
