Astrit Patozi ka reaguar mbrëmë në darkë pas përfundimit të votimit dhe nisjes së numërimit të kutive të votimit për kreun e PD-së, ende pa u shpallur fitorja për një mandat të dytë për Lulzim Bashën.
Nisur nga pjesëmarrja e votuesve, ku kanë votuar rreth 20 mijë demokratë më shumë se 4 vjet më parë, Patozi del në një konkluzion: Sa më e thellë humbja, aq më e madhe dashuria për udhëheqësin e lavdishëm të partisë dhe popullit, duke e krahasuar dhe me diktatorin e Koresë së Veriut, Kim Jong-un.
Ai i kujton vitet e diktaturës 70-80 në Shqipëri, ku më pas shkruan: Të gjithë e mbajnë mend se çfarë ndodhi më pas, Lulzim…
Statusi i plotë:
URIME LULZIM!
Urime Lulzim! Nuk na ke zhgënjyer kurrë. Farsa jote realisht po kapërcen çdo imagjinatë. Unë e parandjeva dhe e paralajmërova në drekë, por të jem i sinqertë, nuk e kisha menduar që do të mbërrinte deri këtu. Ndaj jam i gatshëm të kërkoj ndjesë për fantazinë e pamjaftueshme.
Sipas komisionit të Jeminit kanë votuar rreth 20 mijë demokratë më shumë se 4 vjet më parë.
Konkluzioni: Sa më e thellë humbja, aq më e madhe dashuria për udhëheqësin e lavdishëm të partisë dhe popullit. Sepse është rasti tipik kur dhimbja kthehet në forcë.
Por për shembullin e Koresë së Veriut nuk kam gabuar. Ky është modeli që sot po instalohet në Partinë Demokratike.
Ndërkaq, më kujtohen vitet 70-80 kur, sa më shumë varfëroheshin shqiptarët, aq më shumë shtoheshin sukseset e diktaturës. Por të gjithë e mbajnë mend se çfarë ndodhi më pas, Lulzim…