Teksa Partia Socialiste ka nisur mbledhjen e firmave për shkarkimin e Presidentit Ilir Meta pas vendimit për anulimin e zgjedhjeve të 30 qershorit, ka reaguar kreu i shtetit.

Në një postim në Facebook, gjatë takimit me një grup studentësh e profesorësh nga të gjitha trevat shqiptare me rastin e 141-vjetorit të Lidhjes Shqiptare të Prizrenit, Meta shkruan se Kushtetuta do të mbrohet deri në fund me qetësi dhe shqiptari.

POSTIMI I PLOTË

Në këtë ditë të veçantë për kombin tonë, në 141-vjetorin e Lidhjes Shqiptare të Prizrenit dhe në prag të kremtimit të 20-vjetorit të çlirimit të Kosovës, pata kënaqësinë e veçantë të zhvilloja një takim të ngrohtë e vëllazëror me një grup studentësh e profesorësh nga të gjitha trevat shqiptare, të Kolegjit Universitar AAB në Prishtinë.

I lumtur të ndanim qëndrimin se rinia duhet të jetë promotore e proceseve demokratike dhe integruese në të dy vendet tona dhe se është shumë e rëndësishme që Shqipëria e Kosova të forcojnë bashkëpunimin në të gjitha fushat.

Të bëjmë të gjitha përpjekjet për të rritur shpresat dhe për t’i hapur perspektivat rinisë, për të ndërtuar të ardhmen në vendet tona.
Lidhur me shqetësimin e tyre për zhvillimet në Shqipëri i garantova se Kushtetuta do të mbrohet deri në fund me qetësi dhe shqiptari.