Pas “Jo”-së së Bashkimit Evropian për çeljen e negociatave të anëtarësimit për Shqipërinë, kryeministri Edi Rama ka përsëritur se kjo përgjigje negative është rezultat i përplasjes së qasjeve të ndryshme mes Francës dhe Gjermanisë.

Në një konferencë të përbashkët me ministrin e Jashtëm në detyrë, Gent Cakaj, Rama tha se Franca ka kërkuar reformim të brendshëm të Unionit, madje të vetë procesit të anëtarësimit të vendeve aspirante, përkundër Gjermanisë që ishte pro nisjes së kushtëzuar të bisedimeve.

Sipas shefit të qeverisë, çështja e fluksit të azilantëve është “bisht” që i shtohet thelbësores, pasi në mendimin e tij, “jo ne dhe Maqedonia, por cilido nga vendet nuk do të kishte marrë konsensus”.

PJESË NGA FJALA E RAMËS:

Nuk e them unë, këtë e ka thënë jo vetëm me shkrim KE por e keni dëgjuar vetë të thuhet nga një pjesë e madhe e kryeministrave europiane dhe kancelarja e Gjermanisë. Kam marrë një numër të konsiderueshëm mesazhesh nga kryeministrat e pranishëm në takim. Kam komunikuar edhe me presidentin e Francës. Nëse duam të shikojmë drejt në sy të vëretën është ajo që kam dhënë prej disa kohësh se procesi po shkonte drejt një përplasje mes Francës dhe Gjermanisë. Ndërkohë që Gjermania bëri një lëvizje për shpresën e një kompromisi. Nga ana e Macron nuk ka pasur asnjë hapje. Në konferencën për shtyp i dha të gjitha më shkoqur se vendet e tjera. Franca nuk pranon të vazhdohet me të njëjtin proces. Kërkon reformim deri në pikën që të arrihet në një tjetër objektiv për horizontin e integrimit. Ndërveprimi për Ballkanin Perëndimor nuk mund të zhvillohet me të njëjtin mekanizëm. Liderët e BE e kanë thënë shumë qartë që kjo që ka ndodhur është një rezultat i mosarrtijes së konsensusit mes vendeve anëtare për arsyet e tyre. Është e tepërt kur i shtohen bishta thelbësores. Jo po azilantët. Jo ne dhe Maqedonia, por cilido nga vendet nuk do të kishte marrë konsensus. Kemi marrë një refuzim. Rruga jonë është e njëjta pa asnjë ndryshim. Çfarë kemi bërë deri tani e kemi bërë dhe do të vazhdojmë ta bëjmë për vendin tonë. Reforma në Drejtësi nuk i është kërkuar fare vendeve të tjera. E kemi bërë sepse është gjëja e duhur për ne. E duhura për popullin dhe vendin tonë. Do të vazhdojmë po njësoj me plotësimin e parakushteve të vendosura në votën “Po” të Bundenstagut. Do të vazhdojmë më pas me pjesën tjetër, pikë për pikë kërkesa për funksionimin më të mirë të institucioneve. Jo sepse e ka kërkuar Gjermania. Do t’i bëjmë të gjitha të tjerat pa ndryshar asgjë. Është një lojë qasjesh dhe interesash që është shumë më e madhe sesa ne. Askush nuk e ka përjashtuar perspektivën e integrimit tonë si rajon. Në fund të fundit, integrimi është një proces transformimi të brendshëm.