Maqedonia e Veriut është në pritje të hapjes së negociatave për anëtarësimin në BE, por mosmarrveshja me Bullagarinë nuk po e lejon procesin që të vazhdojë.

Kryeministrin i Maqedonisë së Veriut, Zoran Zaev ka refuzuar që për antarësim në BE të heqin dorë nga gjuhë dhe ideniteti i tyre.

“Bashkimi Evropian nuk na duhet nëse çmimi për këtë është heqja dorë nga gjuha dhe identiteti maqedonas, pasi do të bëhemi si pluhuri i zhdukur në ajër dhe s’do të ketë kush të hyjë në Bashkimin Evropian,” tha Zaev.

Zaev ka kërkuar ndihmën e shteteve anëtare të Bashkimit Evropian për heqjen e bllokadës bullgare dhe nisjen e bisedimeve të anëtarësimit me BE-në.

“Edhe pse  Bullgaria do të shkojë drejt zgjedhjeve të reja parlamentare, unë shpresoj se do të mund të arrijmë një marrëveshje me qeverinë e përkohshme të ekspertëve. Ne kemi arritur edhe marrëveshje tjera të mëdha, duke mbrojtur veçoritë tona kombëtare, pasi kemi të bëjmë të drejtën e vetë përcaktimit. Nuk mund të ketë asnjë marrëveshje që do të përcaktonte identitetin apo gjuhën tonë. Kjo është në kundërshtim edhe me parimet dhe vlerat evropiane,” deklaroi Zaev.

Bullgaria, kërkon që Maqedonia e Veriut të pranojë se gjuha dhe identiteti maqedonas para vitit 1945 të ketë rrënjë bullgare, gjë që kundërshtohet fuqimisht nga vendi.