Pak ditë pasi bëri publike problemet që po kalonte në shtatzaninë e tretë, modelja Chrissy Teigen ka njoftuar së fundmi se fatkeqësisht e ka humbur fëmijën.

Teigen ishte në pritje të një vogëlushi të cilin, ajo dhe bashkëshorti John Legend kishin vendosur ta quanin Jack.

Në një postim prekës në Instagram, modelja shkruan se pavarësisht transfuzioneve të gjakut, bebi nuk ishte në gjendje të merrte lëngjet e nevojshme, pasi gjakderdhja nuk ndalonte.

“Jemi të tronditur dhe në një dhimbje të tillë që nuk e kemi ndjerë kurrë më parë. Ne nuk ishim në gjendje të ndalonim gjakderdhjen dhe t’i jepnim foshnjës sonë lëngjet që i duheshin, pavarësisht qeseve të transfuzioneve të gjakut. Thjesht nuk mjaftonte.

Ne kurrë nuk vendosim për emrat e foshnjave tona deri në momentin e fundit të mundshëm pasi të kenë lindur, pak para se të largohemi nga spitali. Por ne, për ndonjë arsye, kishim filluar ta quanim këtë djalë të vogël në barkun tim Jack. Kështu që ai do të jetë gjithmonë Jack për ne. Jack ka punuar aq shumë që të jetë pjesë e familjes tonë të vogël, dhe ai do të jetë, përgjithmonë.

Për Jack-un tonë – Më vjen shumë keq që momentet e para të jetës tënde u përball me kaq shumë komplikime, saqë ne nuk mund të të jepnim shtëpinë që të duhej për të mbijetuar. Ne gjithmonë do të të duam.

Faleminderit të gjithëve që na keni dërguar energji pozitive dhe lutje. Ne e ndiejmë të gjithë dashurinë tuaj dhe ju vlerësojmë vërtet.

Jemi kaq mirënjohës për jetën që kemi, për fëmijët tanë të mrekullueshëm Luna dhe Miles, për të gjitha gjërat mahnitëse që kemi mundur të përjetojmë. Por e përditshmja nuk mund të jetë plot diell. Në këtë ditë më të errët, ne do të pikëllohemi, do të qajmë por ne do të përqafojmë dhe ta duam më shumë njëri-tjetrin dhe do ta kalojmë atë.”, përfundon ajo ndërsa poston edhe disa foto nga spitali.

 Chrissy Teigen dhe John Legend janë prindër të një vajze 4-vjeçare, Luna Simone, dhe djalit Miles Theodore, 2 vjeç.