Për dekada me radhë të gjithë pasionin e tij e gdhendi në dru. E nisi pasionin e tij që kur ishte fëmi, në zonën e Kolonjës, dhe vit pas viti u perfeksionua duke bërë që sot të konsiderohet një prej mjeshtërve të mirëfilltë të tabllove të gdhendura në dru. Është Xhaferr Laho, i cili jeton në qytetin e Durrësit, por është me origjinë nga Starja e Ersekës.
Pyjet e vendlindjes me shumëllojshmërinë e drurëve i dhanë frymëzimin e duhur, që nëpërmjet tyre të nxirrte në pah vetveten, duke latuar e gdhendur.
Në vitet e rinisë nisi pasioni që nuk u shua kurrë për të nxjerrë prej duarve vepra artistike të mirëfillta e të shumëkërkuara nga njerëzit.. Kur erdhi në Durrës, ai verejti se qyteti i standarteve kishte kërkesa për vepra serioze artistike dhe në këtë hulli ai vijoi punen e tij të suksesshme.
Tashmë Laho është i preferuari i shumë personave dhe ka zënë vend në shumë banesa e vila të vendeve europiane, të cilët duan diçka të bukur nga arti ynë dhe kryesisht nga Durrësi.
Veprat më të shitura janë ato që ai ka realizuar me Nënë Terezën, Shqiponjat, Durrësin etj. Mjeshtri i gdhendjes së drurit, Laho flet me pasion dhe për drurët, të cilët marrin jetë në duart e tij e që ka ditur t’i transformojë në art.
K.H.