Heronjtë e tragjedisë në Durrës, larg familjes dhe në ndihmë të të lënduarve nga tërmeti... (VIDEO)

13/12/2019 - 16:24

Nga Gertjana Daçi

26 nëntori i 2019-ës do mbetet padyshim një datë që nuk mund të harrohet lehtë nga askush në Durrës. Një mëngjes i zhurmshëm, i zymtë, i përgjakur dhe shumë i dhimbshëm.

Një zgjim në mënyrën më të pabesë, një ëndërr e keqe për këdo që po e përjetonte. Sirena ambulance kudo nëpër qytet, telefonatë shprese nën rrënoja, thirrje me zë të mekur për ndihmë në derën e Urgjencës.

Në realitetin e hidhur që Durrësi po kalonte, heronjtë e tragjedisë ishin të dukshëm, disa mbanin përparse të bardha, e disa uniforma të ndryshme që vraponin të futeshin nën gërmadhat e betonit, për të shpëtuar jetë a për të nxjerrë viktima.

Edhe pse kanë kaluar më shumë se dy javë, mjeku kardiolog i Urgjencës së Durrësit, Arjan Tivari, i cili ishte në turn kur toka u lëkund fort, nuk mban dot lotët kur kthehet pas në kohë.

Pas goditjes së fuqishme në orën 03:54, njerëz të shumtë janë paraqitur në Urgjencën e qytetit bregdetar për ndihmë mjekësore.

Siç tregon dhe mjeku Tivari, të lënduarit ishin me fraktura të hapura, me dëmtime në trup, me hematoma, raste nga më të rëndat, thotë ai, një fluks i papërballueshëm me mjekët e turnit ndaj edhe ka kërkuar ndihmën e kolegëve që në minutat e para të ngjarjes.

Tërmeti shkaktoi dëme edhe në Urgjencë, krahas plasaritjeve në mure, grafia pësoi difekt për shkak të shkëputjes së rrymës elektrike, duke vështirësuar më shumë situatën por falë mobilizimit të të gjithë personelit u bë e mundur që procesi i punës të mos ndërpritej për asnjë moment.

E teksa tregon për mobilizimin e kolegëve të spitalit rajonal të Durrësit, Tivari ndan me ndjekësit e "DurrësLajm" edhe rastin e një kirurgu të huaj, i cili ndodhej në qytetin bregdetar dhe është shfaqur në derën e urgjencës për të ofruar ndihmën e tij.

Ndërsa tragjedia preku mbarë qytetin, mjeku kardiolog duhej të ushtronte profesionin e tij fisnik dhe fatkeqësisht të ishte larg familjarëve të tij. Me zërin që i dridhet, ai tregon se i vetmi kontakt me ta ka qenë një telefonatë për tu siguruar që janë mirë. Duke risjellë në vëmendje situatën e atyre ditëve tragjike, ai thekson që figura e bluzave të bardha duhet mbrojtur më shumë.

E duke folur për heronjtë që përballuan pasojat e lëkundjeve sizmike të 26 nëntorit, ndalemi pak te zjarfikësit të cilët i janë përgjigjur thirrjes për mobilizim që në minutat e para, kur dielli nuk kishte lindur ende dhe qiellit i ishin shtuar pluhrat e pallateve e hoteleve të shembura.

Agim Buna, zjarrfikës pranë stacionit të Plazhit tregon sesi kanë arritur të shpëtojnë pronarin e një kompanie në Shkozet, i cili kishte mbetur nën rrënojat e tre kateve të godinës.

"Kemi nxjerrë familjarët tonë në mënyrë të vështirë dhe i jemi përgjigjur thirrjes në repart sepse është detyrimi ynë, obligimi ynë", thotë Buna ndërsa e quan moment rrënqethës dhe të paharrueshëm operacionin në fabrikën "Pespa Alumin".

Tërmetet e njëpasnjëshme atë mëngjes, vështirësojnë punën e tyre në kërkim-shpëtimin e pronarit të biznesit pasi brenda mbetën edhe dy kolegët e tij.

Por me mbarimin e lëkundjeve të fuqishme për fat të keq nuk mbaron gjithçka, post-trauma i shoqëron qytetarët e Durrësit në ditët në vijim.

Erida Meta, psikologe pranë spitalit rajonal Durrës, tregon se në Urgjencë janë paraqitur shumë pacientë me probleme të ankthit, të frymëmarrjes, apo mpirje të gjymtyrëve, ndërsa për menaxhimin e situatës nuk kanë munguar as psikologët vullnetarë nga qytete të ndryshme.

Ajo ndan me ne edhe rastin e individëve që kishin humbur banesën para syve dhe pasojat e tërmetit ishin akoma më të rënda, ata mendonin se lëkundjet vijonin dhe godina ku ishin do të shembej mbi ta.

Grupmosha që ka shfaqur më shumë probleme ka qenë ajo 20-30 si dhe 50-vjeçarë të prekur edhe nga sëmundjet kronike. Psikologia Meta këshillon që sidomos ndaj fëmijëve duhet treguar një kujdes më i veçantë për t’iu shpjeguar atyre këto fenomene natyrore që fatkeqësisht goditën tokën tonë.

Tërmeti me magnitudë 6.4 i shkallës Rihter trazoi jetën e kujtdo, rrënoi shtëpi, pallate, hotele dhe mori 51 jetë por tregoi që dhimbje të tilla përballohen kur bëhemi të gjithë bashkë!

/portali DurresLajm/

Video: 
Na bëni like në facebook!: 

Lajme nga e njëjta kategori

Një datë e rëndësishme në historinë e detarisë shqiptare: si sot 74 vite më parë, Porti i Durrësit kaloi nga kujdestaria e Forcës Detare

  • Janë 11- të nga më të mirët
  • Të lajmë borxhin që i kemi traditës

- Ti ruajmë dhe mbrojmë traditat tonë kulturore

- Nihilizmi dukuri e gabuar dhe keqdashëse

Me rastin e 3-vjetorit të ndarjes nga jeta...

     Një rrëfim ndryshe për Genci Alizotin