Frank Lampard nga dita e sotme nuk do të jetë më trajner i Chelsea-t. Mediet në Angli e bëjnë të sigurt largimin e 42-vjeçarit nga stoli i bluve të Londrës për shkak të rezultateve të dobëta, çka reflektohet me klasifikimin në vendin e 9-të në Premier League.
Mësohet se futbollistëve u është komunikuar që të mos paraqiten në stërvitje deri në orët e pasdites së kësaj të hëne. Lampard do të jetë trajneri i 10-të i shkarkuar gjatë epokës së drejtimit të klubit nga manjati rus, Roman Abramovich.
Zyrtarizimi i shkarkimit të Lampardit mund të vijë në orët në vazhdim. Fitorja e së dielës ndaj Luton Town, që kualifikoi Chelsea-n në FA Cup nuk ka qenë provë e mjaftueshme për të shpëtuar ish-mesfushorin nga largimi.
Ish-trajneri i Paris Saint-Germain dhe Borussia Dortmundit, Thomas Tuchel, është në “pole” për zëvendësimin e Lampardit. Bisedimet me Tuchelin, i cili është trajner i lirë pas shkarkimit nga drejtuesit e PSG-së në fund të dhjetorit, po vijojnë por ende nuk është arritur marrëveshja.
Edhe trajneri i Leipzigut, Julian Nagelsmann, pëlqehet shumë nga drejtuesit e Chelsea-t, por duket e vështirë që ai të shkëputet nga klubi gjerman në mes të sezonit, ndaj dhe Tuchel mbetet pa rivalë për të marrë drejtimin e bluve të Londrës.
