Martini: Vllazninë e njoh mirë, por fitojmë ne! (VIDEO)

Një shkodran që kërkon t’i vendosë “shkopinjtë nën rrota” Vllaznisë, ai është Edi Martini, trajneri i Teutës, i cili pas fitimit të Kupës dhe Superkupës, ka objektiv titullin me durrsakët në këtë sezon dhe vazhdimësinë Teuta do ta kërkojë në Loro Boriçi në sfidën e kësaj të premteje.

Edi Martini e ka të qartë që e pret një duel i vështirë por beson te triumfi i Teutës. Në konferencën për shtyp ai komentoi edhe të ardhmen e sulmuesit Rubin Hebaj i cili ka kërkuar largimin nga “Djemtë e detit”.

“Është e disata herë që përballem me Vllazninë si trajner i një ekipi tjetër. Këtë radhë emocionet janë edhe më të forta sepse po luajmë ndaj një Vllaznie, që kryeson klasifikimin që nga java e parë dhe normalisht është një ndeshje shumë e vështirë, prandaj edhe emocionet janë edhe më të mëdha.

E kam theksuar edhe më parë, ne hyjmë në fushë për të fituar, cilido qoftë kundërshtari. Normalisht kemi vështirësi. E njohim mjaft mirë ekipin kundërshtar, i dimë pikat e forta dhe të dobëta të tyre, gjithsesi fusha tregon gjithçka.Kam thënë se ekipi është i kompletuar. Kemi mbyllur vitin e shkuar me një fitore direkte ndaj Kukësit, nuk kemi problematika të mëdha. Të them të drejtën nuk e kam mendjen aty, jemi të fokusuar te ndeshjet dhe nuk kemi shumë kohë të pushojmë.

Do të ketë ndonjë afrim, por nuk kemi ndonjë pikë të dobët, të cilën duhet me patjetër ta përmirësojmë. Unë i përgëzoj të gjithë te Vllaznia, kanë bërë një punë shumë të mirë, që nuk është pritur, kështu që Vllaznia ka luajtur mirë, ka bërë ndeshje të mira. Ne hyjmë për të fituar ndeshjen.Na mjafton fitorja, nuk e kam mendjen te golat. E kam ditur edhe më parë se qendërsulmuesit tanë do të liroheshin sepse ndodhin situata të tilla, pavarësisht se ne na zgjati pak më shumë seç duhet. Kam besimin e plotë se lojtarët që kam në dispozicion janë të aftë që në momente të vështira të gjejnë veten.

Hebaj ka kërkuar largimin? Janë punë të klubit dhe presidencës, ne jemi të fokusuar te ndeshja e nesërme, që është tepër e rëndësishme, për të tjerat flasim më vonë”, u shpreh Martini.