Teuta luan në fundjavë një ndeshje delikate, me skuadrën që deri më tani nuk ka asnjë humbje në Superiore pas pesë javësh, Kastriotin e Krujës. Durrsakët luajnë në shtëpi dhe pas barazimeve, tashmë duan 3 pikët.
Por, Edi Martini, trajneri i Teutës nuk do të ketë një nga pikat e forta të skuadrës së tij, mbrojtësin Rustem Hoxha. Por, do të rikthehet Lorencio Vila, sulmuesi kryesor sezonin e shkuar dhe që kishte shënuar 1 gol në tri javë para se klubi ta pezullonte për debate me trajnerin.
Teuta është ndërtuar për titull dhe një fitore në pesë javë është shumë pak për durrsakët që deri më tani janë ende larg pritshmërive, ndonëse në Durrës është investuar shumë, duke afruar mjaft kualitete nga skuadrat që pretendonin titullin në elitë në sezonin e shkuar…
