Kylian Mbappe duket të jetë i qartë rreth ambicieve dhe qëllimeve të tij për të ardhmen, të paktën sipas asaj që ka zbuluar gazeta javore franceze “Le Journal du Dimanche”. Real Madridi ende ëndërron ta ketë në skuadër Kylian Mbappen dhe, sipas të përjavshmes franceze, 20-vjeçari e ka gjigantin spanjoll në planet e tij.
Gazeta franceze ka publikuar deklarata të një të afërmit të yllit të Paris Saint-Germainit, i cili ka pohuar se Mbappe kishte treguar përse nuk ishte transferuar në Madrid më 2017. Në atë kohë, thuhet se Mbappe kishte theksuar: Nëse shkoj në moshën 18-vjeçare, çfarë do të bëj kur t’i mbush 23 vjet?”
I afërmi i Mbappes më pas ka konfirmuar diçka që do t’ua kënaqë veshët madrilenëve: “Mbappe e sheh veten duke luajtur në Madrid”. Reali ka mall për ta blerë Mbappen, i cili shihet si talenti më i madh në botën e futbollit, por klubi i tij aktual, PSG-ja, ka këmbëngulur se nuk është e hapur për bisedime për shitjen e tij, pasi ia pagoi Monacos plot 180 milionë euro për shërbimet e tij.
Derisa vetë lojtari nuk ia ka mbyllur derën kalimit në Madrid, presidenti Florentino Perez e di se do të jetë shumë e vështirë ta bindë klubin parisien ta lëshojë francezin.
