Të paktën 10 të vdekur e dhjetëra të tjerë që po luftojnë për jetën është bilanci tragjik i një zjarri masiv që shkrumboi një kazino në Kamboxhia pas mesnatës.

Pamje të rënda të ngjarjes janë shpërndarë me shpejtësi në internet, disa prej të cilave duket se tregojnë njerëzit e bllokuar brenda kompleksit ndërsa disa të tjerë janë varur në dritaret e godinës për t`i shpëtuar tmerrit të flakëve.

Agence France-Presse ka parë një raport të policisë, ku thuhet se të lënduarit janë të paktën 30 dhe se në hotelin-kazino “Grand Diamond City” në Poipet, në kufirin me Tajlandën, punonin të paktën 400 vetë.

Shtypi vendas shkruan se mes personave të mbetur brenda kazinosë ka pasur edhe shtetas të huaj. Pjesa më e madhe e viktimave të identifikuara deri tani janë punonjës kamboxhianë dhe tajlandezë.