Kreu i Komisionit të Ekonomisë, Erjon Braçe nuk e ka pritur aspak mirë listën e çmimeve për ardhjen e Chris Brown në Durrës.
Fakti që një tavolinë tek zona "VIP", kushtonte 3 mijë euro e ka shtyrë deputetin socialist të thumbojë Drejtoreshën e Tatimeve, Briseida Shehaj.
Ai pyet se nëse punonjësit e Tatimeve kanë inspektuar klubin në Durrës ku u mbajt koncerti i rrepistit amerikan, Chris Brown. Briseida Shehaj Braçe ka marrë shkak nga një listë e çmimeve që u kthye në virale në internet, ku çmimet për rezervimin e një tavoline shkonin deri në 3 mijë euro.
"Po lexoj per koncertin e Chris Brown ne Durres. Me thene te drejten, me bejne pershtypje cmimet, por per tatimet. PYTJE E KAM: A ISHTE KUSH NGA TATIMET PER TE VERTETUAR XHIRON DJE NE “KONCERTIN”PARAMBLEDHJEN E CHRIS BROWN? Do ta bej pyetjen edhe zyrtarisht prane Drejtorise se Pergjithshme te Tatimeve per te kuptuar shpenzimin e djeshem, faturimin dhe TVSH e deklaruar!", shkruan Braçe.
Reagimi i Tatimeve
Drejtoria e Përgjithshme e Tatimeve ka reaguar në një deklaratë për mediat pasi deputeti i Partisë Socialiste, Erjon Braçe ngriti pikëpyetje nëse tatimorët kishin ushtruar kontroll në lokalit ku u mbajt koncerti i Chris Brown në Durrës.
Në reagimin e Tatimeve thuhet se, lokali është monitoruar dhe se të dhënat e do të verifikohen.
Reagimi i plotë i Drejtorisë së Tatimeve:
Dje në orën 10 ka filluar monitorimi i subjektit në Durrës. Subjekti kishte të instaluara 4 kasa fiskale, 1 te dera ku pritej bileta dhe 3 në banak. Kishte 37 të punësuar. Në subjekt, punonjësit e inspektoriatit tatimor kanë qëndruar për rreth katër orë. Të gjitha të dhënat e konstatuara dje do verifikohen në Tiranë.
Subjekti është i regjistruar në Tirane dhe do mbahet në monitorim të vazhdueshëm, pasi do ketë evente javore. Drejtoria e Përgjithshme ka udhëzuar që në fillim të sezonit drejtoritë rajonale të monitorojnë këto aktivitete në çdo qytet.
