Fëmijët kanë imagjinatë tepër aktive – kështu që nuk është çudi që natën, kur ata nuk mund të shohin siç duhet, mendjet e tyre të vogla ta teprojnë me imagjinatën.
Ata mund të dallojnë diçka në dhomën e tyre – një grumbull rrobash, për shembull – që mendojnë se është një përbindësh. Ose shohin diçka që lëviz nëpër dhomë dhe kjo i frikëson.
Sipas ekspertëve, ka disa orendi në dhomën e fëmijës suaj që mund të kontribuojnë në tmerret e natës. Ja çfarë duhet të dinë prindërit.
1. Pasqyrat
Së pari, largoni çdo pasqyrë. Nëse ka pasqyra në dhomën e fëmijës suaj, vendosini ato në mënyrë që të mos jenë të dukshme nga shtrati.
2. Mbajeni rrëmujën në minimum
Çdo rrëmujë në dhomën e gjumit të fëmijës suaj ka potencialin të shkaktojë frikë gjatë natës – kështu që mbani rregull në dhomë.
Një grumbull rrobash mund të mos duket shumë i frikshëm gjatë ditës, por mund të shndërrohet në diçka shumë më të keqe nën vellon e errësirës.
3. Vendosni perde minimaliste
Perdet janë shpesh një burim frike në dhomat e fëmijëve, sipas ekspertëve, lejojnë imagjinatën e vogël të krijojë imazhe të dikujt ose diçkaje që fshihet pas tyre. Mbani perde të vogla ose mos vini fare.
4. Rimendoni çdo art të murit
Superheronjtë janë shumë të popullarizuar në mesin e fëmijëve, por sfondi, dekori ose vepra arti me temë aksioni mund të kontribuojnë gjithashtu në tmerret e tyre të natës.
Ekspertët rekomandojnë shmangien e çdo gjëje me imazhe të dhunshme ose armiqësore që tregojnë armë, skena luftimi ose veprime agresive, si për shembull përleshja e superheronjve, ninxhave ose peshkaqenëve.
Në vend të kësaj, zgjidhni vepra arti të qeta, foto familjare ose vizatime me kornizë të vetë fëmijëve.
