KAPSHTICE, 13 prill 2013- 620 kg lëndë narkotike kanabis sativa është sekuestruar në pikën e kalimit kufitar të Kapshticës në Korçë.
Gjatë një kontrolli rutinë në një kamion frigoriferik policia kufitare shqiptare ka gjetur sasinë e madhe të lëndës narkotike.
Transportuesi i saj, shtetasi grek Ilias Aslanidhis është ndaluar nga policia.
Pas marrjes në pyetje rezultoi se lënda narkotike ishte marrë në Lazarat dhe destinacioni i saj ishte shteti grek.
Droga ishte e presuar dhe e paketuar në 390 pako.
Drejtuesi i kamionit frigoriferik i ishte shmangur doganës së Kakavijës me shpresën se do të mund të kalonte më me lehtësi në atë të Kapshticës.
Por gjatë kontrollit të policisë kufitare në dyshemenë e kamionit u zbuluan pakot me kanabis.
Në orët e para të mëngjesit të sotëm, kamioni frigoriferik është marrë në dorëzim nga seksioni i luftës kundër drogës pranë drejtorisë së policisë në Korçë.
