Një 52-vjeçar nga Maqedonia është arrestuar mëngjesin e sotëm në pikën kufitare të Qafë-Thanës, pasi ishte i shpallur në kërkim ndërkombëtar në Bullgari.
Arrestimi i tij u bë me qëllim ekstradimi, ndërsa në Bullgari mbi 52-vjeçarin të identifikuar me inicialet R.H., rëndon akuza “Shkelje të ligjit kundër sistemit monetar dhe sistemit kreditor”.
Njoftimi i policisë:
Arrestohet me qëllim ekstradimi drejt Bullgarisë, një shtetas maqedonas i shpallur në kërkim ndërkombëtar, për veprën penale “Shkelje të ligjit kundër sistemit monetar dhe sistemit kreditor”.
Shërbimet e Stacionit të Policisë Kufitare në Qafë-Thanë, në bashkëpunim me Interpol Tirana, bënë arrestimin me qëllim ekstradimin drejt Bullgarisë të shtetasit maqedonas të shpallur në kërkim ndërkombëtar:
R.H, 52 vjeç, banues në Shkup.
Arrestimi i tij u bë në hyrje të Republikës së Shqipërisë, sepse gjatë verifikimit të dokumentacionit në sistem, shtetasi i mësipërm rezultoi i shpallur në kërkim ndërkombëtar pasi Gjykata e Blagoevgrad, Bullgari, ka caktuar masën e arrestit ndërkombëtar për veprën penale të lartpërmendur, të parashikuar nga Kodi Penal Bullgar.
Maksimumi i dënimit është 8 vjet burgim.
Për veprime të mëtejshme, u njoftua ZQK Interpol Tirana me qëllim ekstradimin e këtij shtetasi drejt Bullgarisë.
