Akademiku Artan Fuga shkruan në Facebook se është në pritje të vendimit të Presidentit Ilir Meta, nëse do e pranojë kërkesën e ministres së Arsimit, Besa Shahini për të shkarkuar nga detyra rektorin e Universiteti të Tiranës, Mynyr Koni.
Ndër të tjera, Fuga shkruan se po e pret me padurim vendimin e Metës, nëse ai do të dalë apo jo në mbrojtje të autonomisë dhe ligjit.
POSTIMI I PLOTË
Duke pritur vendimin e z. President!
——-
Presim me durim dhe shumë vëmendje vendimin e z.Ilir Meta: Do ta gëlltisë ai që ministrja e arsimit pushon nga puna një rektor apo do të rezistoje në mbrojtje të ligjit dhe të kompetencave kushtetuese për të cilat është zgjedhur?
Do t’a mbrojë ai autonominë universitare sikurse kam besim se do t’a bëjë apo do t’ja japi dhuratë prirjeve antidemokratike dhe antiligjore që po i marrin frymën jetës dhe botës intelektuale, shkencore, artistike?
Do t’i imponohet dot ministrja Presidentit të vendit, apo Presidenti do të mbrojë autonominë universitare? Ta shohim!
Do të jetë një test i madh për të parë se ku ndodhemi, çfarë na pret dhe cilat janë strategjitë e aktorëve politikë dhe institucionalë të vendit!
