Kryetari i Partisë Demokratike lajmin për rekomandimin pozitiv të KE-së për çeljen e negociatave për anëtarësimin e Shqipërisë në BE, e ka marrë në Berlin ku ndodhet në takime politikanë të Bundestagut gjermanë.
E vlerëson si një moment mjaft të rëndësishëm për Shqipërinë dhe përpjekjet e saj në rrugën evropiane, por thotë se nuk është kohë për të festuar.
Përmes një reagimi në rrjetin social Facebook, Basha bën të ditur se nga takimet që ka patur atje ka parë se Gjermania, Franca dhe Holanda, janë disi skeptike për të dhënë votën pro për integrimin e Shqipërisë. Kujtojmë se nëse të gjitha vendet anëtare të BE-së nuk janë pro, atëherë Shqipërisë i digjet mundësia për t'u anëtarësuar në familjen e madhe evropiane.
Sipas liderit demokrat Shqipëria duhet të japë me prova arritje në shtetin e së drejtës, luftën kundër krimit dhe korrupsionit. Kjo është ajo çka Basha thotë se kanë kërkuar shtetet skeptike.
Reagimi:
Rekomandimi i Komisionit Europian për çeljen e negociatave me Shqipërinë është një vendim i rëndësishëm që i paraprin takimit të Këshillit Europian në 28-29 qershor 2018, kur vendet anëtare do të vendosin për hapjen e negociatave me Shqipërinë. Para së gjithash, ai është shprehje e vullnetit politik të BE-së për të mbështetur aspiratën europiane të Shqipërisë.
Por sot nuk është momenti për të festuar, por për të punuar. Disa nga vendet kryesore Europiane janë skeptikë për Shqipërinë, dhe kërkojnë arritje dhe prova të vërteta, veçanërisht në shtetin e së drejtës, luftën kundër krimit dhe korrupsionit.
Një nga këto vende është Gjermania, parlamenti i së cilës është ende i pavendosur për qëndrimin ndaj Shqipërisë. Sot kam zhvilluar takime të shumta me parlamentarë dhe funksionarë të qeverisë gjermane, në të cilat kam argumentuar pro hapjes së negociatave si një hap i rëndësishëm në vetvete për të forcuar demokracinë, shtetin ligjor dhe luftën kundër krimit dhe korrupsionit. Zhvillova seancë dëgjimore me deputetët e grupit më të madh parlamentar gjerman CDU/CSU, dhe me anëtarët të Komisionit për Çështjet Europiane dhe të Politikës së Jashtme. Pata takime të vecanta me Johann Wadephul, Nënkryetar i Grupit Parlamentar CDU/CSU dhe Kryetar i Grupit të Punës për Ballkanin, me Gunther Krichbaum, Kryetarin e Komisionit për Çështje Europiane; me Raporterin e CDU/CSU për Shqipërinë Thorsten Frei, me Këshilltarin e Grupit CDU/CSU për punët e Jashtme dhe sigurinë Joachim Falenski. Takime të rëndësishme zhvillova edhe me përfaqësues të lartë të qeverisë dhe në kancelarinë gjermane ku u prita nga Këshilltari i Kancelares Merkel për Politikën e Jashtme dhe Sigurinë Dr. Jan Hecker.
Shpresoj që këto takime të kenë kontribuar sadopak që qeveria gjermane dhe Bundestagu të mbështesë dhe votojë pro hapjes së negociatave, duke i hapur rrugën votës pro të Gjermanisë në qershor. Sikurse shpresoj që edhe Franca dhe Holanda do të përqafojnë aspiratën e madhe të shqiptarëve për të qenë pjesë e BE-së.
