Skandali i zbuluar se Brazili ka eksportuar mish të kalbur drejt Europës dhe Azisë që tronditi sot të gjithë opinion publik është drejtuar drejt specialistëve të ushqimit, të cilët sqarojnë nëse është me vend paniku i krijuar i ditës. Vendet europiane, prej disa ditësh janë në alarm nga ngarkesat e mishit të pulave dhe gjeldetit të prekur me Salmonella Enteritidis, të cilat transportohen nga Brazili dhe, siç thotë edhe specialisti i ushqimit pranë Fakultetit të Mjekësisë Veterinare, Kristaq Berxholi, problemi me mishin e tregtuar nga Brazili është i hershëm dhe për këtë, AKU duhet të marrë përgjegjësitë e veta.

I pyetur nga “Pasdite në Top Chennel” për rrezikun që shfaq ky lloj mishi në familjet tona, Berxholi tha: “Ky lloj mishi i transportuar nga Brazili, prej kohësh është ndalur nga shumë shtete ndërkombëtare. E para që e ndaloi ishte Kina dhe pas saj, edhe vendet e Europës e më gjerë. Ky lloj mishi ka qëndruar për një kohë shumë të gjatë në frigorifer, pra ka rezultuar të jetë mish i kalbur. Gjermanët e quajnë mish i mbaruar, sepse jo vetëm që nuk ka asnjë vlerë ushqimore, por përkundrazi, paraqet rrezikshmëri të lartë për shëndetin e të gjithëve e sidomos për fëmijët.”

Problemi i salmonelave bën me dije Berxholi është një problem i madh. Në rast se mishi ngrin, shkrin dhe ngrin përsëri bëhet i rrezikshëm: “Këtu tek ne, gati 25 për qind e mishit të importuar me salmonelë janë mish importi. Problemi i salmonelave është me shumë rrezik për fëmijët. Kryesorja është që edhe pas zierjes, salmonelat mund të vdesin, por ato që mbeten janë toksinat, të cilat nuk shkatërrohen as pas gradëve të larta”, sqaron më tej specialisti.

Si ta kontrollojmë ne vetë?

"Siguria ushqimore është detyrë e shtetit. Një nga këto është AKU, një institucion të ngritur dhe i pasur me laboratorë", thotë Berxholi, megjithatë thekson edhe kujdesin që duhet të tregojë secili nga ne me mishin që konsumojmë.

Si duhet të mbrohemi?

Mund të mbrohesh duke zbatuar disa kritere:

Produktet që merren duhet të manipulohen veçmas dhe në frigorifer, brenda rregullave dhe jo me produkte të përgatitura.i kalbur

Mjetet në të cilat përgatitet mishi duhet të jenë sterile.

Ambienti ku e keni prerë mishin, minimumi duhet të lahet me sapun dhe jo me ilaç, por me sapun kallëp, sepse është dezinfektant shumë i mirë.

E rëndësishme është temperatura e përpunimit. Mishi duhet të ziejë mirë, sepse salmonela shkatërrohet në 70 – 80 gradë, por jo toksinat.