13 shkurt 2015 – Boca Unidos di Corrientes, një klub në kategorinë e dytë argjentinase të futbollit, ka prishur kontratën me mbrojtësin Ivan Diaz pasi ky i fundit ka rrahur brutalisht të fejuarën e tij.
Menjëherë, pasi është denoncuar nga vajza e dhunuar, klubi ka përjashtuar 22-vjeçarin, i cili nga ana e tij është mbrojtur duke thënë që partnerja e tij i ka shkaktuar vetë plagët, por faktet e përgënjeshtrojnë.
Gjithçka ka ndodhur në fundjavë: pas një zënke në diskotekë, vajza me emrin Florencia e ka gjetur të fejuarin e saj në një motel, së bashku me dy femra të tjera. Aty ka shpërthyer një debat i ashpër dhe futbollisti e ka rrahur brutalisht partneren e tij, duke e lënë pa ndjenja. Diaz, i cili u arrestua dhe u la i lirë pas 24 orësh, mund të rikthehet në burg, pasi prokurori i çështjes e akuzon për agresion.
