– 1 km pas Shetajt një kthesë në të majtë, 5-6 min rrugë fshati (e paasfaltuar), ja destinacioni ideal për ata që janë lodhur nga ndotja dhe zhurma, dhe kërkojnë diçka të veçantë për pushimet

– Plazh i virgjër, i qetë, pa ndërtime, pa beton, i kristaltë

– Synohet zhvillimi i një modeli turizmi të qëndrueshëm në komunën Ishëm; angazhimi i punonjësve vendas; impakt ekonomik drejtpërdrejt nga rritja e punësimit dhe krijimi i kërkesës për produkte e shërbime vendase; model për zhvillimin e turizmit rural 

– Eko-kampi bazohet në krijimin e një strukture ekologjike të përbërë nga materiale të ricikluara, çadra të ndërtuara konform natyrës, ushqime natyrore dhe aktivitete të ndryshme sportive

– Për të ardhshmen po punohet për krijimin e një infrastrukture që përdor kompost tualet, energji me panel diellor dhe menaxhim i qëndrueshëm i plehrave të zonës

 

DURRËS, 3 shtator 2014 –  Kryeqytetasit ia dinë “kimetin” Ishmit më mirë se durrsakët, madje, një rrip të vogël plazhi kanë ngritur një eko-kamping të quajtur  Atlantid Beach, kështu një OJQ e quajtur  Tirana Ekspres e përbërë nga një grup profesionistësh, artistë dhe promotorë, po promovojnë zhvillimin e qëndrueshëm të eko-turizmit në fshatin Shetaj, duke tërhequr dhe vëmendjen ndërkombëtare, përfshirë mediet italiane, për idetë aletrnative.

DESTINACIONI IDEAL   

Eko-kampi  Atlantid Beach, i cili ndodhet në Fushqetë në komunën e Ishmit, është projekt i radhës për zhvillim i eko-turizmit nga OJQ-ja  Tirana Ekspres (TE)

Është destinacioni ideal për ata që janë lodhur nga ndotja dhe zhurma, dhe kërkojnë diçka të veçantë për pushimet.

ATLANTID-i është plazh i virgjër, në një nga zonat më të bukura të Shqipërisë.

I qetë, pa ndërtime, pa beton… i kristaltë!

Duke qenë një vend aq i bukur dhe frymëzues, vullnetarët e morën, e pastruan, rregulluan dhe ofruan ca mundësi e kushte për secilin që dëshiron t’i bashkohet magjisë së këtij vendi.

Deti jo i ndotur, rëra e bardhë, muzika, zjarri, skara dhe plot veprimtari kulturore-sportive.

ATLANTID PROMOVON EKO TURIZMIN

Sipas drejtuesve të TE-së, synohet zhvillimi i një modeli turizmi të qëndrueshëm në komunën Ishëm; angazhimi i punonjësve vendas; impakt ekonomik drejtpërdrejt nga rritja e punësimit dhe krijimi i kërkesës për produkte e shërbime vendase; një model për zhvillimin e turizmit rural. 

Kampi bazohet në krijimin e një strukture ekologjike të përbërë materialet të ricikluara, çadra të ndërtuara konform natyrës, ushqime natyrore dhe aktivitete të ndryshme sportive.

Për të ardhmen po punohet për krijimin e një infrastrukture që përdor kompost tualet, energji me panel diellor dhe menaxhim i qëndrueshëm i plehrave të zonës.

AKTIVITETE DHE SHERBIME

Infrastruktura: akomodim (çadra kampingu me qira: 7 euro / 1000 lekë nata / person që përfshin dysheku, batanije, shezllonë dhe çadër plazhi), bar, restorant, tualete dhe dushe te thjeshta, biblioteka “Treks”.

Guida turistike në pikat e vrojtimit dhe kalanë e Skënderbeut, kurse Yoga (me prenotim), tours me kanoa, evente kulturore.

Rruga për në ATLANTID beach është një nga rrugët më piktoreske të Shqipërisë. Fshatrat e vogla, të ndërtuara me shtëpitë karakteristike; fushat e kodrat përmes të cilave kalon rruga janë vërtet mahnitëse.

Prej sipër fshatit të bukur Shetaj, e deri në ATLANTID amatorët e natyrës do t’i shoqërojë relievi i pafund i detit.

Pastaj vetëm 1 km pas Shetajt një kthesë në të majtë; 5-6 min rrugë fshati (e paasfaltuar) dhe ja  ATLANTID beach.

Info

Tirana Ekspres (TE) prej më se një viti është qendra e gravitetit të kulturës alternative të kryeqytetit.

Lindur si nismë e një grupi producentësh, artistësh dhe aktivistësh të pavarur, kjo hapësirë ka shërbyer si katalizator i skenës së artit alternativ dhe mendimit social, në nivel lokal, kombëtar dhe ndërkombëtar.

Gjatë vitit të parë, TE-ja ka realizuar bashkëpunime me një numër të konsiderueshëm të institucioneve më të rëndësishme, vendase dhe të huaja.

Ekspozitat, eventet kulturore të iniciuara dhe organizuara nga TE-ja, kanë pasur mbështetjen e Ministrisë së Kulturës, Bashkisë Tiranë, Ambasadës Amerikane, Ambasadës së Republikës së Francës, Alliance Française, Ambasadës së Mbretërisë së Vendeve të Ulëta, British Council, Austrian Development, etj.

Komuniteti i TE-së ka mundur të realizojë ndërveprimin mes grupeve profesioniste të art-kulturës dhe aksionit civil, si dhe rinisë aktive të angazhuar të kryeqytetit.

TE-ja është laborator idesh, por mbi të gjitha punishte e veprimit konkret, ku akti krijues thuret mbi rrjetën e mendimit kritik, frymës së bashkësisë dhe përgjegjësisë civile.

TE-ja nxit publikun e saj për përmirësimin e cilësisë së jetës dhe ruajtjen e vlerave të trashëgimisë historike, kulturore dhe natyrore, përmes krijimit dhe promovimit të nismave komunitare

/përgatiti: th. m. agjencia e lajmeve “Dyrrah”/